ԵՐԵՎԱՆ, 1 հուլիսի — Sputnik. Մոտավորապես 3 լ ջուր խմել։ Այս խորհուրդը կօգնի մարդկանց խուսափել արևահարումից ու ջրազրկումից։ Առողջապահության նախարարության հորդորին հետևում է նաև զգուշացումը` խոսքը չի վերաբերում սրտանոթային կամ միզասեռական հիվանդություններ ունեցող մարդկանց։
Ներս ընկած աչքեր, չորացած ու սուր դիմագծեր ստացած դեմք, մեզի մուգ գույն, աչքերի առաջ մթագնում։ Սրանք այն նախանշաններն են, որոնք խոսում են ջրազրկման մասին։
«Նաև մաշկից կարելի է հասկանալ` ջրազրկում կա, թե ոչ։ Կարելի է մաշկը սեղմել, ծալք անել ու թողնել։ Չջրազրկված օրգանիզմում ծալքը պետք է վերականգնվի, իսկ եթե ջրազրկված է, այդ ծալքը 30-60 վայրկյանում նոր վերականգնվում է»,-ասում է բժիշկ-դիետոլոգ Հասմիկ Աբովյանը։
Նյարդաբան Սամսոն Խաչատրյանն էլ ավելացնում է` եթե խնդիրը խորանում է, մարմնի ջերմաստիճանն անդառնալիորեն բարձրանում է և նույնիսկ մահվան հանգեցնում։
«Այդ ամենից խուսափելու համար պետք է մարդիկ պատկերացնեն իրենց անելիքները շոգ եղանակին` ուր են գնում, ինչպես պետք է խուսափել արևի ուղիղ ճառագայթներից»,-ասում է նա։
Եթե ժամանակին հայերն արևահարվում էին տեղեկացվածության պակասի պատճառով, ապա այսօր իրավիճակն ավելի բարվոք է։
«Շտապօգնության» տնօրեն Թագուհի Ստեփանյանը Sputnik Արմենիայի հետ զրույցում նշեց, որ վերջին մեկ շաբաթվա ընթացքում 1-2 կանչ է գրանցվել` արևահարության հետ կապված։
«Թեթև թուլություն ու գլխացավ են ունեցել։ Բարեբախտաբար արտառոց դեպքեր չկան։ Իսկ թունավորման դեպքեր կան, բայց դրանք նորմայի սահմանում են»,-ասաց Ստեփանյանը։
Չջրազրկվելու համար հորդորներից մեկն էլ դուր չի գա սուրճ սիրող ու չարաշահող հայերին։ Հնարավորին չափ քիչ պետք է օգտագործել կոֆեին ու շաքար պարունակող ըմպելիքներ։ Արգելվում է երկար ժամանակ ու արևի տակ մնալ ավտոմեքենաների մեջ ու չօդափոխվող տարածքներում։ Ի դեպ, ուլտրամանուշակագույն ճառագայթների նկատմամբ հատկապես զգայուն են ծերերը, հղիներն ու քրոնիկ հիվանդություններ ունեցողները։
Առողջապահական ոլորտի մասնագետները խորհուրդ են տալիս բացառել կրեմային հրուշակեղենի օգտագործումը, չգնել տեղում լցնովի պաղպաղակ, զովացուցիչ ըմպելիք, կվաս, թարմ մրգերից պատրաստվող հյութեր։ Սրանք կարող են թունավորման պոտենցիալ աղբյուր դառնալ։
