ԵՐԵՎԱՆ, 25 հունիսի-Sputnik. Sputnik Արմենիայի անցկացրած հարցախույզի արդյունքները ցույց են տվել, որ հայերին ոչ միայն եղանակն է զարմացնում, այլև այն փաստը, որ ամառվա առաջին ամիսն արդեն ավարտվում է։
«Ինչպե՞ս եք որոշել անցկացնել ձեր ամառային հանգիստը» հարցին պատասխանելիս` քվեարկածների 37 տոկոսն հինգ տարբերակներից ընտրել է զավեշտալի, բայց իրականությանը մոտ պատասխանը` «բայց արդեն ամա՞ռ է»։ Բացատրությունը շատ պարզ է. արևառատ Հայաստանի այս տարվա ամառն անսովոր զով է, քամոտ և անձրևաշատ։
Հարցախույզի մասնակիցների 21,7 տոկոսը նշել է, որ հանգիստն առանց ծովի չի պատկերացնում, 17,4 տոկոսը նախընտրելի տարբերակ է համարել ակտիվ հանգիստը, իսկ 10,9 տոկոսն էլ նշել է, որ լիարժեք հանգստանալ կարելի է միայն հանգստյան տանը։ Մասնակիցների 13 տոկոսը հայտնել է, որ «ծույլ» հանգստի կողմնակից է։ Նրանք համոզված են` ավելի լավ է հանգստանալ տանը` հեռուստացույցի դիմաց կամ գիրքը ձեռքին։
Միաժամանակ Sputnik Արմենիայի մեկ այլ հարցախույզը ցույց է տվել, որ շատերը նախընտրում են հանգստանալ շոգ օգոստոսին։ Նման պատասխան է ընտրել հարցվածների 36,2 տոկոսը` պատասխանելով այն հարցին, թե «ո՞ր ամսին եք նախընտրում արձակուրդ գնալ»։ Հարցվածների 19,1 տոկոսն է նշել հունիս և հուլիս ամիսները։
Հարցման մասնակիցների 19,1 տոկոսը պատասխանել է, որ այս տարի հանգստանալու հույս չունի։ Օգտատերերի 6,4 տոկոսն էլ անկեղծ պատասխանել է, որ ընդհանրապես չի հանգստանալու։
