ԵՐԵՎԱՆ, 28 հունիսի — Sputnik. Թուրքական արտադրանքը, որը պատժամիջոցների պատճառով արգելվել է ներկրել Ռուսաստան, փոխարինվել է Հայաստանի, Ադրբեջանի, Սերբիայի և Չիլիի արտադրանքով, որը որակով չի տարբերվում, ՌԻԱ Նովոստիին տված հարցազրույցում հայտարարել է Մոսկվայի առևտրի և ծառայությունների բաժնի ղեկավար Ալեքսեյ Նեմերյուկը։
Նախօրեին Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Ռեջեփ Թայիփ Էրդողանը նամակ է ուղարկել Վլադիմիր Պուտինին և խորը ափսոսանք է հայտնել Սու-24-ի ռուս օդաչուի մահվան կապակցությամբ։ Ավելի ուշ գյուղատնտեսության նախարար Ալեքսանդր Տկաչյովը ՌԻԱ Նովոստիին հայտնել է, որ պետք է այս հարցի առնչությամբ քաղաքական որոշման սպասել։
«Որակով` ոչ (չեն զիջում)։ Օրինակ` թուրքական հնդկահավի միսը լիովին փոխարինվել է չիլիականով։ Առաջին եռամսյակում առաքվել է 24 հազար տոննա։ Արտադրանքի տեսականու մի մասն իր վրա է վերցրել Սերբիան։ Հինգ ամսվա ընթացքում այդ երկրից արտահանումն աճել է 9 տոկոսով։ Պետք է հիշել, որ ռուսական շուկան բավական տարողունակ է. Մոսկվան սպառում է 12 մլն տոննա, դա շատ մեծ թիվ է»,- Նեմերյուկը պատասխանել է ՌԻԱ Նովոստիի այն հարցին, թե արդյո՞ք փոխվել է մթերքների որակը։
Նրա խոսքով` մայրաքաղաքի իշխանությունները փոխարինել են թուրքական արտադրանքը, մասնավորապես, Հայաստանից և Ադրբեջանից ներկրված մթերքով։
«Եթե դիտարկենք 2016թ.-ի առաջին եռամսյակը, ապա անցած տարվա նույն ժամանակահատվածի համեմատ Ադրբեջանից առաքվող լոլիկի ծավալն ավելացել է 4 անգամ, Մարոկկոյից` 1,5 անգամ, Իրանից առաքվող վարունգի ծավալը` գրեթե 2 անգամ, Պակիստանից առաքվող մանդարինի ծավալը` 1,5 անգամ։ Հավի միս մենք միշտ էլ շատ ենք ունեցել»,- պարզաբանել է պաշտոնյան։
Ռուսաստանը 2016 թվականի հունվարի 1-ից արգելել է մի շարք ապրանքների ներկրումը Թուրքիայից, արգելված արտադրանքի թվում են մսեղենը, հավը և հնդկահավը, թարմ և սառեցված լոլիկը, սոխը, ծաղկակաղամբը և բրոկոլին, վարունգը, թարմ և չորացրած մանդարինն ու նարինջը, խաղողը, խնձորը, տանձը, ծիրանը և այլ մրգեր։ Մինչ այդ Թուրքիան առաջատար դիրք էր զբաղեցնում Ռուսաստան արտահանած լոլիկի ծավալով։ Ռուսաստանի և Թուրքիայի հարաբերությունները սրվեցին այն բանից հետո, երբ Սիրիայում թուրքական F-16-ը խոցեց ռուսական Սու-24 ռմբարկուն։
