ԵՐԵՎԱՆ, 23 հունիսի — Sputnik. Հռոմի պապի այցը Ծիծեռնակաբերդ բարոյական հզոր քայլ կլինի, քանի որ նա բացեիբաց մարտահրավեր կնետի Թուրքիային, վստահ է ԱՄՆ-ի Հայ դատի հանձնախմբի գործադիր տնօրեն Արամ Համբարյանը։ Այս մասին հայտնում է Asbarez-ը։
«Հռոմի պապի եռօրյա այցի կուլմինացիոն պահը լինելու է Ծիծեռնակաբերդկատարած այցը, որտեղ հնչեցրած նրա աղոթքները լսելի կլինեն ամբողջ աշխարհում: Հռոմի պապի այցելությունը Հայոց ցեղասպանության զոհերի հուշահամալիր, ի հակադրություն Թուրքիայի իշխանությունների ժխտողական քաղաքականության, բարոյական հզոր քայլ կլինի: Փաստացի Ֆրանցիսկոս պապն ամբողջ աշխարհի առաջ ամենասրբազան վայրում բացեիբաց մարտահրավեր կնետի Թուրքիային, որը փորձում է պատմության էջերից ջնջել իր գործած սարսափելի հանցանքը»,-ասել է Արամ Համբարյանը:
Նա նաև հույս է հայտնել, որ Հռոմի պապի այցը ԱՄՆ-ի իշխանություններին կստիպի վերջ տալ Թուրքիայի ժխտողական քաղաքականությանն ուղղված աջակցությանը:
2015թ.-ի ապրիլի 12-ին Հռոմի պապը «ցեղասպանություն» է որակել 1915թ.-ի տեղի ունեցած դեպքերն ու Վատիկանում պատարագ մատուցել` ի հիշատակ բոլոր նահատակների:
«20-րդ դարի առաջին ցեղասպանությունը տեղի է ունեցել հայ ժողովրդի` աշխարհում առաջին քրիստոնյա ազգի հետ: Մեր պարտքն է հարգել նրանց հիշատակը, հակառակ դեպքում` մենք թույլ կտանք, որ չարիքն անընդհատ բացի հին վերքերը: Չարիքը թաքցնելը կամ ժխտելը հավասարազոր է նրան, որ արնահոսող վերքը չվիրակապվի»,- պատարագից առաջ ասել է Պապը:
Նախօրեին Հռոմի պապը ուղերձ է հղել համայն հայությանը` նշելով, որ հայոց պատմությունն ու հայ ժողովրդի հետ կատարված իրադարձություններն իր մեջ հիացմունք և վիշտ են առաջացնում:
