ԵՐԵՎԱՆ, 2 հունիսի — Sputnik. Լեռնային Ղարաբաղի Հանրապետության ու Ադրբեջանի սահմանի շփման գծի երկայնքով կատարված ռազմական գործողություններից հետո ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկն իրադրության հարթման նպատակով որոշակի առաջարկություններ է արել։ Այս մասին հայտնեց Շավարշ Քոչարյանն ու հրաժարվեց հավելյալ մեկնաբանություններ անել։
«Կան նաև այլ միջոցներ, որոնց մասին դեռ պետք է բանակցություններ լինեն։ Մի բան հաստատ է` մինչև չկա հաստատված կրակի ռեժիմի դադարեցում, վստահության միջոցներ գոյություն չունեն, դժվար ու գրեթե անհնարին է որևէ առաջընթաց ակնկալել»,-ասաց նա։
Շավարշ Քոչարյանը մեկնաբանեց նաև ՀՀԿ խմբակցության ղեկավար Վահրամ Բաղդասարյանի այն հայտարարությունը, որ «հայկական կողմի կորցրած 800 հեկտար տարածքը ռազմական նշանակություն չունի և պետք չէ ծանրանալ այդ խնդրի վրա»։
«Եկեք արձանագրենք, որ Ադրբեջանի կողմից օկուպացված են ԼՂՀ Մարտակերտի շրջանի շատ ավելի մեծ տարածքներ, ուշ թե շուտ այդ տարածքները վերադարձվելու են ԼՂՀ-ին»,-ասաց Քոչարյանը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
