ԵՐԵՎԱՆ, 1 հունիսի — Sputnik. Երևանի Օլիմպիական խաղերի չեմպիոն Իրինա Ռոդնինայի անվան մարզադպրոցում կայացավ գեղասահքի Հայաստանի բաց առաջնությունը, հայտնում է ՀԱՕԿ լրատվության բաժինը:
Մեծահասակների աղջիկների պայքարում 150,26 միավորով բաց առաջնության հաղթող դարձավ պատանեկան Օլիմպիական խաղերի մասնակից Անաստասիա Գալուստյանը: Երկրորդ տեղում Միլենա Դանիելյանն է (68,34 միավոր) և եռյակի վերջում Նատալի Գզիրյանն է (54.99 միավոր):
Տղաների մրցաշարին մասնակցում էր միայն երկու գեղասահորդ` Սլավիկ Հայրապետյանը և Ջեկ Կերմեզյանը: 178,45 միավորով առաջին տեղում Սլավիկ Հայրապետյանն է, իսկ Կերմեզյանը, ով ներկայացնում է Կանադան, հավաքեց 177,44 միավոր:
«Ֆեդերացիայի խորհրդի անդամներով և մարզչական կազմով որոշեցինք անցկացնել ոչ թե Հայաստանի առաջնությունը, այլ բաց առաջնություն: Նպատակ ունեինք արտասահմանից ևս հյուրեր ունենալ` այդ կերպ նպաստելով երեխաների առաջընթացին»,- փաստեց գեղասահքի Հայաստանի ֆեդերացիայի նախագահ Մելանյա Ստեփանյանը:
Գեղասահորդուհի Անաստանիս Գալուսյանն ուրախ է բաց առաջնությունում առաջին հորիզոնականում լինելու համար:
«Այստեղ բոլորը ջերմ են` պատրաստակամ օգնելու: Թեպետ մարզադահլիճում շատ ցուրտ է, բայց ամեն ինչ շատ լավ է անցնում: Ուրախ էի բաց առաջնությանը մասնակցելու համար»,- ասաց Անաստասիա Գալուստյանը:
Հայաստանի բաց առաջնության պարգևատրման արարողությունը կկայանա հունիսի 1-ին, որի ժամանակ գեղասահորդները կներկայանան ցուցադրական ելույթներով: Ընդհանուր առմամբ առաջնությանը մասնակցում էր 45 գեղասահորդ:
