ԵՐԵՎԱՆ, 19 փետրվարի — Sputnik. Գեղասահորդուհի Անաստասիա Գալուստյանը, ով վատառողջ էր Լիլեհամերում ավարտվող Երկրորդ պատանեկան օլիմպիական խաղերի ժամանակ, ՀԱՕԿ լրատվականի հետ զրույցում ասել է, որ կհավաքի ամբողջ ուժերը` աշխարհի առաջնությանն ըստ արժանվույն ներկայանալու համար։
«Վերականգնվելուց հետո կսկսեմ նախապատրաստվել աշխարհի առաջնությանը, որն այս տարի անցկացվելու է ԱՄՆ-ի Բոստոն քաղաքում»,- ասել է Անաստասիա Գալուստյանը։
Նա տխրել էր, որ հիվանդությունը թույլ չտվեց ավելի լավ ներկայանալ Օլիմպիական խաղերին:
«Ինձ դուր եկավ, թե ինչպես սահեցի կարճ ծրագրի ժամանակ, բայց որևէ մեկնաբանություն չեմ տա ազատ ծրագրի վերաբերյալ: Կարող էի չմասնակցել ազատ ծրագրին, սակայն որոշեցի մասնակցել, թեպետ ջերմում էի, դրանից հետո ինքնազգացողությունս ավելի վատացավ»,- նշեց Գալուստյանը:
Այդուհանդերձ, նա դրական տպավորություններով է վերադարձել Լիլեհամերից, նոր ընկեր է գտել։
Գալուստյանը շեշտեց` հպարտ է, որ միջազգային մրցաշարերում հենց Հայաստանն է ներկայացնում։
«Դեռևս 2012 թվականին առաջարկ կար հայկական կողմից, և ես չէի կարող հրաժարվել նման հնարավորությունից: Ինձ համար մեծ պատիվ է հանդես գալ հայկական դրոշի ներքո: Միշտ էլ ասել եմ այդ մասին և կրկնելու եմ` հպարտ եմ, որ հայրս, պապս հայեր են, և իմ արմատները հայկական են: Առավել հաճելի է, երբ երկրպագուներն են շատանում, այն էլ` հայ»,- ընդգծել է նա:
Գալուստյանը պատմել է նաև, որ գեղասահքն իրենց ընտանիքում ապրելակերպ է։
«Ծնողներս երկուսն էլ գեղասահորդներ են: Ես էլ սկսեցի գեղասահքով զբաղվել, և դա տրամաբանական էր: Մեր ընտանիքը կարծես գեղասահքով ապրող ընտանիք լինի: Իսկ առաջին և միակ մարզիչներս եղել են և կան ծնողներս»,- հայտնել է գեղասահորդուհին։
Նշենք, որ Պատանեկան օլիմպիական խաղերի ժամանակ Հայաստանի ներկայացուցիչ, գեղասահորդուհի Անաստասիա Գալուստյանը զբաղեցրեց 10-րդ հորիզոնականը։
