ԵՐԵՎԱՆ, 31 մայիսի — Sputnik, Լաուրա Սարգսյան. Հարությունյանի անվան քառյակը մեկ տարեկան էլ չկա, սակայն այս կարճ ժամանակահատվածում հասցրել է գրավել ոչ միայն տեղի, այլև միջազգային լսարանի սերը։
Նրանք օրեր առաջ են վերադարձել Չինաստանից, որտեղ համերգով եղել են վեց քաղաքում, ինչպես նաև Լիբանանում Հայաստանի պետական երիտասարդական նվագախմբի հետ միասին մասնակցել են «Ալ Բուստան» դասական երաժշտության միջազգային փառատոնին։
Ինչ վերաբերում է չինական ուղևորությանը, քառյակի ներկայացուցիչները նշում են, որ այնտեղ նրանց զարմացրել է լսարանը, որը հիմնականում բաղկացած էր երեխաներից։
«Սա վկայում է այն մասին, որ չինացիները հատուկ ուշադրություն են դարձնում դասական երաժշտությանը` որպես կրթության անբաժանելի մաս», — Sputnik Արմենիա միջազգային մամուլի կենտրոնում մամուլի ասուլիսի ժամանակ ասաց համույթի դաշնակահարուհի Լիլիթ Զաքարյանը։
Նա նշեց, որ իր մոտ միտք ծագեց` ստեղծել այնպիսի քառյակ, որը կտարբերվի մյուսներից։
«Այն բացառիկ է առաջին հերթին իր կազմով։ Այս երաժշտական գործիքների համադրությունը թույլ կտա, որպեսզի մի շարք ստեղծագործություններ յուրահատուկ ձևով հնչեն», — նշեց Լիլիթը։
Քառյակը ստեղծվել է Հայաստանի պետական երիտասարդական նվագախմբի դիրիժոր և գեղարվեստական ղեկավար Սերգեյ Սմբատյանի աջակցությամբ, երաժիշտները նվագում են ֆագոտ, ֆլեյտա, դաշնամուր և կլառնետ։
Համույթի անդամները նշում են, որ փորձում են առաջին հերթին տարածել հայ կոմպոզիտորների երաժշտությունը։
«Հարությունյանի քառյակը բացառիկ է, որի կազմում նվագում են Հայաստանի երիտասարդական նվագախմբի լավագույն երաժիշտները։ Նրանք նվագախմբի կազմում են արդեն տասը տարի», — ասաց Հայաստանի պետական երիտասարդական նվագախմբի տնօրեն Աննա Տեր-Հովակիմյանը։
Հոկտեմբերին քառյակը կնշի իր տարեդարձը, և դեռ չգիտի, թե ինչ համերգային ծրագրով ելույթ կունենա հանդիսատեսի առջև։ Խումբը հաճախ է կատարում Հարությունյանի, Խաչատրյանի, Չայկովսկու, Ռախմանինովի, Պրոկոֆևի, Բերնստայնի ստեղծագործությունները։
«Մենք վարակված ենք երաժշտությամբ, և մինչ օրս անբուժելի հիվանդ ենք», — ասաց քառյակի ներկայացուցիչ Նիկոլայ Պողոսյանը։
Հարությունյանի անվան քառյակը միակը չէ. պետական երիտասարդական նվագախմբին կից գործում են նաև Սարյանի անվան քառյակը, Աբգար Մուրադյանի անվան դուետը։ Հարությունյանի քառյակին աջակցում է Ալեքսանդր Հարությունյանի դուստր Նարինե Հարությունյանը։
