Սերժ Թանկյան, Վադիմ Ռեպին, Վլադիմիր Սպիվակով, Ջիվան Գասպարյան. նրանք այն անվանի երաժիշտներից մի քանիսն են, որոնք չէին եկել Օպերայի և բալետի թատրոն, բայց այնուամենայնիվ շնորհավորեցին Հայաստանի պետական երիտասարդական նվագախմբի 10-ամյակն իրենց տեսաուղերձներով։
Համերգի տոմսերն ազատ վաճառքում չեն եղել։ Դահլիճում տեղերի մեծամասնությունը զբաղեցրել էին մշակույթի գործիչները և պաշտոնատար անձինք, որոնք հրավիրատոմսեր էին ստացել համերգի մասնակիցներից և կազմակերպիչներից։
Գլխավոր դիրիժոր և գեղարվեստական ղեկավար Սերգեյ Սմբատյանը նախօրեին Sputnik Արմենիա ռադիոյին տված հարցազրույցում պատմել էր Հայաստանի Պետական երիտասարդական նվագախմբի կայացման պատմության մեջ երեք բեկումնային պահերի մասին։
Սմբատյանի խոսքով` առաջին ձեռքբերումը 2006թ.-ի հունվարի 25-ի համերգն էր, երբ նվագախմբի երիտասարդ մասնակիցներն առաջին անգամ բարձրացան մեծ բեմ։ Երկրորդ բեկումնային պահը եղել է Բեռլինի համերգը։
«2007թ.-ին մենք չափազանց ոգեշնչված էինք բեռլինեցիների բուռն ծափահարություններից. չէ՞ որ ամեն մեկը չէ, ում կընդունեն դասական երաժշտության համաշխարհային մայրաքաղաքում»,- համոզված է Սմբատյանը։
Սերգեյ Սմբատյանը երրորդ ձեռքբերում է նշում Հայաստանի կառավարության կողմից պետական նվագախմբի կարգավիճակ ստանալը։
Նվագախմբի գլխավոր խնդիրներից մեկը լսարանի «երիտասարդացումն» է։ Հենց այդ պատճառով Սմբատյանը և իր թիմը մտածել են «Նոն ստոպ» ծրագիրը` հոլիվուդյան հայտնի մեղեդիների գործիքավորումներով։
«Երբ մենք մեկուկես ժամ տևող սիմֆոնիա ենք նվագում, մեր երիտասարդ հանդիսատեսը հաճույքով գալիս է համերգի. չէ՞ որ պոպուլյար երաժշտության միջոցով նա արդեն ծանոթացել է սիմֆոնիկ նվագախմբի հետ և արդեն պատրաստված է գալիս համերգներին»,- ասաց Սմբատյանը։
Նվագախմբի հետ միասին նվագել են նաև բանդոնեոնահար Մարիո Ստեֆանո Պիետրոդարկին, ջութակահարուհի Յուկա Ցուբոյը, դաշնակահար Ալեքսանդր Ռոմանովսկին և համույթի վաղեմի բարեկամ, թավջութակահար Նարեկ Հախնազարյանը։
Հանդիսատեսի կարծիքով` ամենահուզիչ պահը երաժիշտների ելույթն էր «իրենք իրենց հետ»։ Օրինակ` Նարեկ Հախնազարյանի ելույթի ժամանակ կարելի էր հետևել, թե ինչպես նա թավջութակ նվագել մի քանի տարի առաջ և համեմատել «անցյալի պատկերը» ժամանակակից կատարման հետ։
Հանդիսատեսը գոհ էր համերգից։ Երկրի նախագահ Սերժ Սարգսյանը և նրա տիկինը, կոմպոզիտոր Քշիշտոֆ Պենդերեցկին դահլիճի հետ միասին հոտնկայս ծափահարում էր երիտասարդ երաժիշտներին։
