ԵՐԵՎԱՆ, 31 մայիսի — Sputnik. Երևանում ծխող կանայք կազմում են կանանց ընդհանուր թվի շուրջ 7-8 տոկոսը, մարզերում կրկնակի պակաս է նրանց թիվը, լրագրողներին ասաց Հայաստանի առողջապահության ազգային ինստիտուտի տնօրեն Ալեքսանդր Բազարչյանը։
«Հայաստանում 2016 թվականին անցկացված հետազոտության համաձայն` վիճակագրությունը վերջին տարիներին լուրջ փոփոխությունների չի ենթարկվել։ 16 տարեկանից բարձր տղամարդկանց շուրջ 53 տոկոսը ծխում է», — ասաց Բազարչյանը։
Նրա խոսքով` որոշակի փոփոխություններ նկատվում են տարիքային խմբերում։ Ծխողների թիվը զգալիորեն նվազում է 45-50 տարեկանից հետո։ Հավանաբար դա կապված է առողջական խնդիրների առաջացման հետ։
Ինչ վերաբերում է կանանց, ապա Երևանում ցուցանիշը հասնում է մինչև 7-8%, մարզերում` մոտ 3%։ Հարևան երկրների համեմատ այդ ցուցանիշը Հայաստանում ամենալավն է։ Նույնը վերաբերում է դեռահասներին` 13-15 տարեկանում ծխում են տղաների 9%-ը, աղջիկների` 1%-ը (միջինը 6%)։
Վերջին մի քանի ամիսների ընթացքում (2013 թվականից) Հայաստանում ծխողների թիվը նվազել է ընդամենը 2%-ով։ Ցուցանիշի բարելավման համար, մասնագետի կարծիքով, անհրաժեշտ է ակտիվ հականիկոտինային գործունեություն ծավալել։
Այդ քայլերից մեկը կարող է լինել հասարակական վայրերում ծխելն արգելելը, ինչպես, օրինակ, Ռուսաստանում և Ուկրաինայում։
Բազարչյանն ընդգծեց, որ պասիվ ծխողների մեծամասնությունը ծուխ է շնչում ոչ թե հասարակական վայրերում, այլ տանը, քանի որ ծխում է ընտանիքի անդամներից մեկը։
Ծխողների քանակի նվազեցման համար լուրջ գործոն կարող է լինել այն, որ աստիճանաբար մտցվի այն գաղափարը, որ ծխելն ամոթ է։ Այդ գործոնը կարող է զգալիորեն ազդել ծխողների քանակի նվազեցման վրա, հատկապես երիտասարդների շրջանում։
Ծխելու դեմ պայքարի ևս մեկ միջոց կարող է դառնալ ծխախոտի տուփը։ Օրինակ` եվրոպական երկրներում տուփի ավելի քան կեսը պետք է զբաղեցնի ծխախոտ գնելու ցանկությունը նվազեցնող գրությունն ու նկարը։ Սրան գումարած, Բազարչյանի խոսքով, արժե ծխախոտը վերացնել սեղանիկներից, հեռացնել երեխաների աչքից։
Ծխախոտի տեսակների և դրանց որակի մասին խոսելիս մասնագետը կոչ արեց ուշադրություն չդարձնել դրանց վրա։
«Առողջությանը հասցված վնասի տեսանկյունից որևէ տարբերություն չկա որակյալ և անորակ ծխախոտի միջև», — ասաց Բազարչյանը։
Նա ընդգծեց, որ ծխելը նպաստում է քաղցկեղի առաջացմանը, կա այդ հիվանդության տեսակ, որն առաջանում է միայն ծխողների մոտ։ Թոքերի քաղցկեղ ունեցող մարդկանց շուրջ 80%-ը ծխող է։
Սակայն սրանով հիվանդությունները չեն սահմանափակվում, մի շարք հիվանդություններ կան, որոնք կարող են առաջանալ ծխելու պատճառով, այդ թվում` ասթման, որը ձևավորվում է ծխախոտի ծուխը շնչող երեխաների մոտ։
