Լաուրա Սարգսյան, Sputnik.
Դիլիջանի լեռնային բնության մեջ, բազմաթիվ ծառերով շրջապատված` գտնվում է UWC Dilijan միջազգային քոլեջը։ Բազմազգ դպրոցը բացվել է 2014 թվականին, և այս տարի հրաժեշտ է տվել իր առաջին շրջանավարտներին։
Բազմազգ UWC Դիլիջան
Դպրոցի աշակերտներից մեկը Սեբաստիան Բելաբելիզիան է, ով այստեղ սովորելու է եկել հեռավոր Գանայից (Արևմտյան Աֆրիկա) և զարմացած է Դիլիջանի բնակիչների ընկերասիրությամբ։ Այսօր Սեբաստիանը սովորում է առաջին կուրսում և ավարտելուց հետո նախատեսում է մեկնել ԱՄՆ սովորելու։ Նա ցանկանում է ինժեներ դառնալ և վերադառնալ հայրենիք։
«Դիլիջանը շատ բան փոխեց իմ մեջ։ Ես այն եզակի աֆրիկացիներից էի, ով ընկավ միանգամայն այլ միջավայր։ Օգնում էր տեղի բնակչության ընկերասիրությունը», — Sputnik Արմենիայի թղթակցի հետ զրույցում ասաց Սեբաստիանը։
Հարևան Վրաստանից Դիլիջան է եկել սովորելու Սաշա Չխեիձեն։ Նա Սեբաստիանի պես առաջին կուրսում է սովորում, սակայն նախատեսում է Անգլիա մեկնել սովորելու։
«Մինչ այդ ես երբեք չէի եղել Հայաստանում, և ամեն ինչից զարմացել էի։ Այստեղ ես հասկացա, որ ոչինչ չգիտեի հարևան Հայաստանի մասին, թեև միշտ ապրել եմ 4 ժամվա հեռավորության վրա», — խոստովանեց Սաշան։
UWC դպրոցը համարվում է մի վայր, որտեղ իրականանում են երազանքները, և սկիզբ է դրվում հետագա զարգացման համար։
Մուրմանսկից ժամանած UWC շրջանավարտ Ելենա Վասիլևային գրավել է փորձառական կրթության փորձը։ Նա կարծում է, որ հենց այս դպրոցն է իրեն շատ բան տվել և դռներ բացել դեպի «պայծառ ապագա»։
«Քոլեջի, այստեղ ստացած գիտելիքների շնորհիվ ես ընդունվեցի Լոնդոնի համալսարանական քոլեջ։ Դպրոցն ինձ սովորեցրեց հավատալ ինձ, սեփական ուժերիս և նրան, որ ցանկացած իրավիճակում արդյունքն անպայման դրական է լինելու», — ասաց Ելենան։
Ալինա Խաչատրյանը Մասիսից ավարտել է քոլեջը Ելենայի հետ և ընդունվել Էդինբուրգի (Մեծ Բրիտանիա) համալսարան։ Նա խոստովանում է, որ քոլեջն իրեն բացի ընկերներից` գիտելիքների մեծ պաշար է տվել։
Անի Գևորգյանը ծնվել է Երևանում և իր համակուրսեցիների պես գերազանց ավարտել դպրոցը։ Նա խոստովանում է, որ ամենադժվարն այս երկու տարվա ընթացքում սովորելն է եղել, սակայն գործադրած ջանքերի շնորհիվ նա ընդունվել է Լոնդոնի Թագավորական քոլեջի միջազգային հարաբերություններ բաժին։ Աղջիկը ցանկանում է ապագայում Հայաստանում UWC դպրոցի ձևաչափով համալսարան բացել։
Ի՞նչ է UWC-ը
Դիլիջանում միջազգային քոլեջի պաշտոնական բացումը տեղի է ունեցել 2014 թվականին։ Այսօր դպրոցում սովորում է 192 աշակերտ աշխարհի ավելի քան 63 երկրից, իսկ աշխարհում նմանատիպ 15 դպրոց կա։
Միջազգային բակալավրիատի դիպլոմի ուսումնական ծրագիրը (International Baccalaureate Diploma) պահանջված է ամբողջ աշխարհում և նախապատրաստական փուլ է համարվում լավագույն բուհերում ուսանելու համար։
Դպրոցում 6 առարկա է դասավանդվում, որոնք պարտադիր կամ ընտրովի են։ Պարտադիր առարկաների ցանկում են անգլերենը, օտար լեզուն, մեկ առարկա բնական գիտություններից (քիմիա, ֆիզիկա և այլն) և հումանիտար գիտություններից (հոգեբանություն, փիլիսոփայություն, պատմություն և այլն)։
UWC-ը հայտնի է նաև իր գրադարանով, որտեղ աշխարհի ավելի քան 60 լեզվով 3000 գիրք կա։ Դպրոցը ժամանակ առ ժամանակ մասնակցել է միջազգային մրցույթների և բազմիցս առաջատար դիրքեր է զբաղեցրել, այդ թվում` նաև իր ճարտարապետության համար։
Բացի տարաբնույթ ծրագրերից` դպրոցի ուսանողների համար պարտադիր է նաև տեղի բնակչությանը ինտեգրվելու գործընթացը։ Ուսումնական ծրագրի շրջանակում դպրոցականներն ակտիվ մասնակցություն են ունենում Դիլիջանի քաղաքային կյանքում։
UWC Դիլիջան քոլեջը բարերար Ռուբեն Վարդանյանի, Վերոնիկա Զոնաբենդի և նրանց գործընկերների համատեղ նախագիծն է: Դպրոցի ճարտարապետական կոնցեպցիան մշակել է բրիտանական Tim Flynn Architects գրասենյակը: Որպես նախագծի կառուցապատող` հանդես է եկել միջազգային RD Group հոլդինգը:
2015 թվականը UWC Դիլիջան քոլեջի համար նշանավորվեց IGRA Green Roof Leadership Awards-ի մրցանակով՝ «Միտում թելադրող ճարտարապետություն» անվանակարգում և հաղթող ճանաչվեց International Property Awards-ի եվրոպական փուլում՝ «Public ServicesDevelopment» անվանակարգում: Բացի այդ՝ UWC Dilijan College-ը ԱՊՀ տարածքում միակ կրթական հաստատությունն է՝ արտոնագրված BREEAM էկոլոգիական շինարարության չափանիշներով:
