ԵՐԵՎԱՆ, 30 մայիսի — Sputnik. Էկոնոմիկայի նախարարի` թուրքական ապրանքների ներկրումն արգելելու նախաձեռնությունն առնվազն գյուղատնտեսական արտադրանքի մասով կյանքի չի կոչվի։ Նման կարծիք հայտնեց Հայաստանի ագրարագյուղացիական միավորման նախագահ Հրաչ Բերբերյանը։
«Եթե մենք այդ երկրի հետ պատերազմական որևէ խնդիր չունենք, ճիշտ է` բարեկամ երկիր չէ, խառնակիչի դեր է կատարում, բայց այսօր շատ արտադրանք կա, որի կարիքը մենք ունենք, և մենք կարող ենք գտնել շատ բաներ, որոնց կարիքը Թուրքիան ունի»,- ասաց Հրաչ Բերբերյանը։
Այսօր հայաստանյան շուկայում թուրքական գյուղմթերքը բավական մեծ տեղ ունի։ Եվ սա, Հրաչ Բերբերյանի խոսքով, ունի և սուբյեկտիվ և օբյեկտիվ պատճառներ։ Նախ մեր երկրում աճեցված ձմեռային բանջարեղենն անհամեմատ ավելի բարձր ինքնարժեք ունի, ինչն էլ շուկայում մրցունակ է դարձնում թուրքական արտադրանքը։
«Թուրքիայում պոլիէթիլենային թաղանթի տակ, առանց ջեռուցման հնարավոր է բանջարեղեն աճեցնել, իսկ Հայաստանում ջեռուցումը ինքնարժեքի 80%-ն է կազմում»,- նշեց Բերբերյանը։
Բայցևայնպես, Հայաստանում ջերմոցներն աստիճանաբար ավելանում են, ներդրվում են խնայողական տեխնոլոգիաներ, որոնք Հրաչ Բերբերյանի խոսքով, թույլ կտան նվազեցնել հայկական գյուղմթերքի ինքնարժեքն ու բարձրացնել մրցունակությունը։
Հաջորդ խնդիրը, որի հետևանքով այսօր հայկական շուկան ողողված է թուրքական արտադրության կարտոֆիլով, անցած տարվա անբարենպաստ եղանակն է։
«Անցյալ տարի 65 երաշտային օր ունեցանք։ Միայն Շիրակի մարզում 20 օր 40 աստիճանից բարձր ջերմաստիճան է եղել, և, բնականաբար դա պետք է ազդեր կարտոֆիլի վրա»,- ասաց Բերբերյանը` հիշեցնելով, որ այդ օրերին գյուղնախարարությունը փորձում էր վստահեցնել, թե եղանակը բերքի վրա չի ազդի, բայց իր հաշվարկով` բերքի 20 %-ը ոչնչացել է։ Արդյունքում թուրքական վաղահաս կարտոֆիլը Վրաստանով ներթափանցել ու գրավել է հայկական շուկան։ Բայց, սա ըստ մասնագետի, ժամանակավոր երևույթ է, մինչև տեղական կարտոֆիլը կհասնի շուկա և ոչ միայն իր տեղը կգրավի, այլև կարտահանվի։
Իսկ ծիրանն այս տարի, Հրաչ Բերբերյանի կանխատեսումներով, դարձյալ քիչ կլինի, անցյալ տարվա բերքի միայն 30%-ի չափով։ Պատճառը դարձյալ անբարենպաստ եղանակն ու պետական կառույցների անգործությունն է։
«Իհարկե այս տարի ծիրանի բերք չենք ունենա։ Ասել եմ ու էլի կասեմ, հակակարկտային ծառայությունները մեր դժբախտությունն են։ Քանի՞ տարի է պետք ապացուցելու համար, որ այդ սարքերը չեն աշխատում։ Իսկ որ հիմա փորձում են ծիրանի բերք նկարել, իրականությանը չի համապատասխանում, ունենք շատ ցածր բերք, եղել է ցրտահարություն, կարկտահարություն, ուժեղ քամի, որը մեծ վնաս տվեց այգիներին »,- ասաց Բերբերյանը։
Եղանակային անբարենպաստ պայմաններից մեծապես տուժել է նաև խաղողի բերքը։ Այն ևս հրաչ Բերբերյանի խոսքով, այս տարի սակավ կլինի։ Փոխարենը կունենանք բավարար քանակությամբ դեղձ։ Ակնկալվում նաև ցորենի առատ բերք։
ՀՀ գյուղատնտեսության նախարարությունում առայժմ դժվարանում են նշել, թե վերջին օրերին գրանցված կարկուտն ու քամին որքանով են բերքը վնասել ։ Նախարարությունից Sputnik Արմենիայի հարցին ի պատասխան հայտնեցին, որ հանձնաժողովները դեռ աշխատում են տեղերում, ուսումնասիրում են եղանակի հասցրած վնասները։ Իսկ արդյունքները պարզ կլինեն միայն հանձնաժողովների ներկայացրած տեղեկատվության հանրագումարից հետո։
