ԵՐԵՎԱՆ, 3 մայիսի — Sputnik. Թուրքական ապրանքների ներկրման արգելքը Թուրքիային չի վնասի։ Հայաստանի կողմից դա ոչ թե տնտեսական, այլ բարոյական քայլ կլինի։ Այս մասին այսօր լրագրողների հետ հանդիպմանը հայտարարեց «Սպառողների ասոցիացիա» հասարակական կազմակերպության նախագահ Արմեն Պողոսյանը։
Թուրքիայից ներկրումն արգելելն ու դրանից հրաժարվելը Արմեն Պողոսյանը կատեգորիկ մոտեցում է համարում, փոխարենն առաջարկում է բարձրացնել Թուրքիայից ներկրվող ապրանքների մաքսատուրքերը` դրանք հայաստանյան շուկայում անմրցունակ դարձնելու համար։
«Ոչ թե կարող ենք, այլ պարտավոր ենք անել դա, բայց փոխարենը մեկ այլ երկրից ներկրվող ապրանքի մաքսատուրքն իջեցնել` մինչև 0»,- ասաց Արմեն Պողոսյանը` նշելով, որ նման փորձ աշխարհի տարբեր երկրներում կիրառվում է տեղական արտադրությունը խթանելու նպատակով։
Հարկային-մաքսային նման քաղաքականության իրականացման արդյունքում սպասվող գնաճի վերաբերյալ Sputnik Արմենիայի հարցին սպառողների շահերի պաշտպանն այդպես էլ ուղղակի պատասխան չտվեց։
Իսկ լրագրողների հարցերին ի պատասխան բանախոսը պնդեց, որ թուրքական արտադրանքի պահանջարկը հայաստանյան շուկայում կարող է փոխարինվել ինչպես տեղական, այնպես էլ այլ երկրից ներկրվող համարժեք արտադրանքով։
