ԵՐԵՎԱՆ, 18 մայիսի-Sputnik. Օսմանյան կայսրությունում Հայոց ցեղասպանությունը ճանաչող բանաձևը Բունեդսթագում քննակվել է դեռևս 2015 թվականի ապրիլի 24-ին, Բունդեսթագի նախագահ Նորբերթ Լամերթն էլ 1915 թվականի դեպքերն անվանել է «ցեղասպանություն»: Սակայն բանաձևի քննակումը հետաձգվեց անորոշ ժամանակով, և 2016 թվականի փետրվարի 25-ին այս թեմայով ծայր առած բուռն քննարկումները նույնպես քվեարկության չհասան: Կանաչների կուսակցության ներկայացուցիչների՝ իրար հակասող գնահատականներից հետո որոշվեց բանաձևը հետ կանչել ու լրացուցիչ մշակել: Բանաձևի հաջորդ քվեարկությունը նախատեսված է հունիսի 2-ին:
«Առաջին բանաձևը, որ նախորդ տարի ներկայացված էր, բովանդակալից չէր, այնտեղ ցեղասպանություն բառն էլ կարծեմ չէր օգտագործվում, պարզապես 15 թվականի ահավոր ջարդերի մասին էր խոսվում: Այս բանաձևը, որ Կանաչների միության նախաձեռնությամբ է իրականացվում, նշվում է վայրը, թե որտեղ է կատարվել, թե որքան մարդ է զոհվել, ինչ դաժանությամբ են կատարվել սպանությունները»»,-ասաց Հակոբ Չաքրյանը:
Թուրքագետը կարծում է, որ Հայոց ցեղասպանության մասին բանաձևը կընդունվի, որքան էլ Թուրքիան կատաղի և փորձի Գերմանիայի կանցլեր Անգելա Մերկելի վարչակազմի միջոցով տապալել այն:
«Ինչու՞ եմ վստահ, որովհետև Մերկելը Էրդողանին տեղի տալու համար Գերմանիայում քննադատությունների, հարձակումների թիրախ էր դարձել՝ սիրիացի փախստականների, թուրքերին առանց վիզային ռեժիմ ընձեռելու հնարավորության հետ կապված: Եթե այս անգամ էլ տեղի տա Էրդողանի ճնշումներին, կարծում եմ` նա ժողովրդականությունը կկորցնի, որովհետև Էրդողանը Գերմանիայի հասցեին բազմաթիվ անգամ ամենասանձարձակ արտահայտություններն է օգտագործել, որոնք ավելի քան հակասում են դիվանագիտական նորմերին»,-ասաց թուրքագետը:
Նրա խոսքով՝ բանաձևի ընդունման հաջորդ երաշխիքն այն է, որ Կանաչների միությունից բացի, այլ կուսակցություններ ևս աջակցում են նախաձեռնությանը:
«Գերմանիան Եվրամիության առաջնակարգ երկրներից է, հետևաբար, երբ Եվրամիությունը ցեղասպանության հարցում ընդհանուր դիրքորոշում մշակի, Գերմանիան դրան կնպաստի»,-ասաց նա:
Չաքրյանի խոսքով՝ այսօր բազմաթիվ երկրներ կան, որոնց մշակած բանաձևերում հստակ չի նշվում այն վայրը, թե որտեղ է տեղի է Հայոց ցեղասպանությունը: Դրա իրական պատճառն այն է, որ խուսափում են թուրքական արձագանքից:
«Թերևս սա է պատճառը, որ շատ երկրներ վերաճանաչել են իրենց ընդունած բանաձևը, օրինակ՝ Արգենտինան մի քանի անգամ է վերաճանաչել. ընդունել էր անբովանդակ մի բանաձև, հետո այն դարձրեց ավելի բովանդակալից»,-ասաց Չաքրյանը:
Թուրքագետը վստահեցրեց, որ Էրդողանի վարած քաղաքականությունն ինքն իրեն սպառել է: Պատահական չէ, որ նախագահ դառնալուց ի վեր նա պաշտոնական այցով ոչ մի կարևոր երկիր չի մեկնել: 3 տարվա ընթացքում պաշտոնական այցով եղել է միայն Քաթարում ու Սաուդյան Արաբիայում:
