ԵՐԵՎԱՆ, 16 մայիսի-Sputnik. Գոհար Սարգսյան. ՀՀ նախագահ Սերժ Սարգսյանը Վիեննա է մեկնում 3 նախապայմանով, կարծում է Արա Պապյանը։ Դրանք են` վստահության մեխանիզմների ներդրում, հասցեական հայտարարություններ և երաշխիքներ, որ Ադրբեջանը չի գնա նոր ագրեսիայի և ահաբեկչության ԼՂՀ ժողովրդի նկատմամբ։ Արա Պապյանը կարևոր է համարում Հայաստանի առաջարկած հսկող սարքերի տեղադրումը շփման գծի ամբողջ երկայնքով։
Հրանտ Մելիք-Շահնազարյանն էլ կարծում է, որ Վիեննայում կայանալիք հանդիպումն ըստ էության կծառայի հայկական կողմի առաջ քաշած նախապայմանների քննարկմանը։ Քաղաքագետը նկատում է, որ ադրբեջանական մամուլը դա փորձում է ներկայացնել որպես բանակցությունների վերսկսում։
Ըստ բանախոսի բանակցություններն այս պահին հնարավոր չեն։ Սա պարզապես հնարավորություն է մեր դիրքորոշումն ավելի հասկանալի դարձնել միջնորդ երկրների համար։
«Այսօր նախագահ Սերժ Սարգսյանը կփորձի տեղում խիստ պահանջներ ներկայացնել միջնորդ երկրներին և հասնել նրան, որպեսզի իրական քաղաքական ռեսուրսներ գործադրվեն։ Մենք տեսնում ենք, որ քաղաքական զսպման մեխանիզմներ վերջին 2 տարիների ընթացքում չէին աշխատում, դրա համար էլ լուրջ խնդիրներ կային հարցի խաղաղ կարգավորման տեսակետից»,-ասաց Մելիք-Շահնազարյանը։
Հիշեցնենք, որ մայիսի 12-ին Մինսկի խմբի համանախագահները հայտարարել էին, որ ժամանակն է Հայաստանի և Ադրբեջանի նախագահները հանդիպեն։ Եվ ավելացրել են՝ դա հնարավոր կլինի իրականացնել հաջորդ շաբաթ Վիեննայում, և հիմնական նպատակը կլինի ամրապնդել հրադադարի ռեժիմը և համաձայնություն ձեռք բերել վստահության կառուցման գործում:
Հայտարարության հաջորդ օրը ԱՄՆ պետդեպարտամենտը տեղեկացրեց, որ ԱՄՆ պետքարտուղար Ջոն Քերրին այդ օրերին կայցելի Վիեննա, որտեղ ԱՄՆ-ն Ռուսաստանի և Ֆրանսիայի հետ կհյուրընկալի Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը։
