ԵՐԵՎԱՆ, 12 մայիսի — Sputnik. Պրոֆեսիոնալ բռնցքամարտի գերմիջին քաշային կարգում WBO վարկածով աշխարհի նախկին չեմպիոն Արթուր Աբրահամը (44 հաղթանակ (29 նոկաուտով), 5 պարտություն) ռինգ կվերադառնա հուլիսի 16-ին Բեռլինում, հայտնում է «Զաուերլանդ» փրոմոութերական ընկերության պաշտոնական կայքը։
Դա կլինի հայ բռնցքամարտիկի առաջին մենամարտը Լաս Վեգասում մեքսիկացի Ջիլբերտո Ռամիրեսից կրած պարտությունից հետո։
«Ես պատրաստ չեմ հրաժեշտ տալ սպորտին, որը շատ եմ սիրում։ Ռամիրեսի դեմ մենամարտը չընթացավ ըստ նախատեսվածի, բայց ես խոստանում եմ, որ դա չի կրկնվի։ Ես ցույց կտամ, որ կարող եմ ավելի լավ մենամարտել և դարձյալ դառնալ աշխարհի չեմպիոն։ Դա է իմ մեծագույն ցանկությունը»,- ասել է Աբրահամը։
Աբրահամը կշարունակի աշխատել 73-ամյա մարզիչ Ուլի Վեգների հետ։ Աբրահամի մրցակիցը դեռ հայտնի չէ։
