ԵՐԵՎԱՆ, 12 մայիսի — Sputnik. Արմեն Մուրադյանը վստահաբար նշեց, որ քառօրյա պատերազմի ընթացքում ու դրանից հետո հայ բժիշկները բարձր արհեստավարժություն և մարդկային ջերմություն ցուցաբերեցին վիրավոր զինծառայողների նկատմամբ։ Առանձնահատուկ ուշադրություն են ստացել ծանր և ծայրահեղ ծանր վիճակում գտնվող տղաները։
«Ինչ վերաբերում է նրանց ծնողներին, ասեմ, որ ամեն օր նրանց հետ հանդիպում եմ ունեցել։ Նրանք արտահայտել են իրենց տեսակետները, որոնցում, չեմ թաքցնում, հուզական կոմպոնենտ կա։ Նրանք էլ համոզվեցին, որ Հայաստանում հնարավոր են բուժման այն եղանակները, որոնք նրանք տեսնում են արտերկրում»,-ասաց նախարարը։
Միայն ծնողներից երկուսն են պնդում որդիներին տեղափոխել արտերկիր։ Նախարարի խոսքով` իրենց պարտքն է աջակցել այդ գործընթացին, միայն թե մինչ այդ պետք է մանրակրկիտ ուսումնասիրել` արդյոք նրանց առողջական վիճակը թույլ է տալիս մի երկրից մյուսը տեղափոխվել։
«Հարցն այն է` արդյո՞ք ջերմություն ու պառկելախոց ունեցող տղաներին հնարավոր է տեղափոխել։ Երկու զինծառայողներ էլ թթվածնի կախվածություն ունեն»,-ասաց Արմեն Մուրադյանը։
Զրույցի վերջում նախարարը բարի լուր փոխանցեց` զինծառայողներից երկուսն արդեն դուրս են եկել ծայրահեղ ծանր վիճակից։ Այսօր ծրագրվում է նրանց տեղափոխել վերականգնողական կենտրոն և սկսել բուժման գործընթացը։ Այս պահին ծայրահեղ ծանր վիճակում է մեկ զինծառայող։
