ԵՐԵՎԱՆ, 4 ապրիլի — Sputnik. Թուրքական ապրանքների ներկրումից հրաժարվելու հնարավոր տնտեսական և սոցիալական հետևանքների վերաբերյալ ուսումնասիրությունները շարունակվում են Էկոնոմիկայի նախարարությունում։ Դրանց ավարտին նախարարությունը կհրապարակի այն ապրանքների ցուցակը, որոնք Թուրքիայից Հայաստան են ներմուծվում երրորդ երկրի տարածքով և կհրավիրի հանրային քննարկում։ Այս մասին այսօր լրագրողներին տեղեկացրեց Էկոնոմիկայի նախարար Արծվիկ Մինասյանը։
«Կընտրվի այն ապրանքախումբն ու այն գործիքակազմը, որը թույլ կտա պաշտպանել մեր երկրի տնտեսությունը և թույլ չտալ սոցիալական պայթյունավտանգ իրավիճակի առաջացում և երրորդ`ապահովել տնտեսության անվտանգ զարգացում»,- ասաց Արծվիկ Մինասյանը։
Էկոնոմիկայի նախարարը նաև հստակեցրեց, որ խոսքը ոչ թե թուրքական ապրանքների ներկրումն արգելելու, այլ միայն որոշակիորեն սահմանափակելու մասին է։
«Արգելքը շատ կոշտ է ասված։ Արգելք կարող է կիրառվել այն ապրանքների նկատմամբ, որոնք անվտանգության խնդիր են հարուցում»,- ասաց էկոնոմիկայի նախարարը` միաժամանակ հստակեցնելով, որ սպառողի կյանքին կամ առողջությանը սպառնացող վտանգավոր ապրանք հայաստանյան շուկայում այս պահին չկա։
«Որևէ մեկի մտքով այս պահին չի անցնում արգելել մուտքը, մենք խոսում ենք մեր տեղական տնտեսությունը և սպառողների իրավունքները պաշտպանելու մասին»,- նշեց նախարարը։
Ինչ վերաբերում է թուրքական ապրանքների մուտքը Հայաստան սահմանափակելուն, Արծվիկ Մինասյանի խոսքով` դա միջազգայնորեն ընդունված պրակտիկա է և կարող է կիրառվել ոչ միայն թուրքական, այլև հայաստանյան տնտեսության համար ոչ նպաստավոր այլ երկրների արտադրանքի նկատմամբ ևս։
