ԵՐԵՎԱՆ, 23 ապրիլի- Sputnik. Աշխարհում կա ավելի քան 64 մլն ներքին և արտաքին փախստական, ասաց Միջազգային ճգնաժամային խմբի անդամ Հարեթ Էվանսը Երևանում Aurora Dialoguеs քննարկումների ընթացքում:
«Այժմ աշխարհում տեղահանված մարդիկ ավելի շատ են, քան Երկրորդ համաշխարհային պատերազմից հետո՝ 48 միլիոն ներքին տեղահանված անձ, 16 միլիոն՝ արտաքին»,- ասաց Էվանսը:
Նրա խոսքով՝ նման տեղաշարժերի մեկ քառորդ մասը Սիրիայում, Իրաքում և Հարավային Սուդանում ընթացող հակամարտությունների արդյունքն է:
Էվանսի խոսքով՝ ԱՄՆ է տեղափոխվել շուրջ 100 հազար փախստական, բայց հենց Սիրիայում միլիոնավոր տեղափոխված մարդիկ կան: Դա տվյալ պահին աշխարհի ամենալուրջ հակամարտությունն է:
«Ներկայում շուրջ 13,5 մլն սիրիացի պաշտպանության և օգնության կարիք ունի: Փախստականների 95 տոկոսին Արևմուտքը չի ընդունել, բայց նրանք ընդունվել են Հորդանանի, Լիբանանի և Թուրքիայի կողմից՝ հսկայական խնդիրներ ստեղծելով այդ երկրների համար»,- ասաց Էվանսը:
Նա նշեց, որ հակամարտությունները պետք է լուծվեն քաղաքական բանակցությունների միջոցով:Ելույթների, քննարկումների և հարցուպատասխանի միջոցով Aurora Dialogues-ը նպատակ ունի սկիզբ դնել հանրային քննարկումների, որոնք կանդրադառնան անցյալից դասեր քաղելու, ներկայում գործելու և ավելի լավ ապագա ձևավորելու կարևորությանը։ Քննարկվում են մարդասիրական ոլորտի հիմնախնդիրների ներկա վիճակը, փախստականների համաշխարհային ճգնաժամը, մարդասիրության գործում կանանց դերը և հումանիտար ճգնաժամերի վրա աշխարհի ուշադրությունը հրավիրելու հարցում զանգվածային լրատվության հնարավորությունները։
