ԵՐԵՎԱՆ, 23 ապրիլի — Sputnik. Ապրիլի 23-ին 100 LIVES և «Ավրորա» մրցանակի նախաձեռնությամբ ընթանում է Aurora Dialogues քննարկումների շարք՝ աշխարհի առաջատար գիտնականների, բարերարների, մեդիա փորձագետների և մարդասիրության ոլորտի առաջատարների մասնակցությամբ: Այն մասնագիտական քննարկումների շարք է՝ նվիրված մարդասիրությանն առնչվող ամենահրատապ հիմնախնդիրներին ու մարտահրավերներին աշխարհում, հաղորդում է Aurora Prize-ի մամուլի ծառայությունը։
Ելույթների, քննարկումների և հարցուպատասխանի միջոցով Aurora Dialogues-ը նպատակ ունի սկիզբ դնել հանրային քննարկումների, որոնք կանդրադառնան անցյալից դասեր քաղելու, ներկայում գործելու և ավելի լավ ապագա ձևավորելու կարևորությանը։ Քննարկվում են մարդասիրական ոլորտի հիմնախնդիրների ներկա վիճակը, փախստականների համաշխարհային ճգնաժամը, մարդասիրության գործում կանանց դերը և հումանիտար ճգնաժամերի վրա աշխարհի ուշադրությունը հրավիրելու հարցում զանգվածային լրատվության հնարավորությունները։
Այս քննարկումները հնարավորություն են տալիս «Ավրորա» մրցանակաբաշխությանը մասնակցելու համար Հայաստան ժամանած հյուրերին մտքեր ու տեսակետներ փոխանակել վերոնշյալ մարտահրավերներին դիմագրավելու լավագույն ուղիների ընտրության շուրջ։
Aurora Dialogues-ն ընթանում է հետևյալ 4 հարցերի շուրջ.
Առաջին մասը նվիրված է հումանիտար հիմնախնդիրների իրադրությանն աշխարհում: Քննարկումը սկսվել է հատուկ այս նպատակով պատվիրված և իրականացված The Humanitarian Index հարցման տվյալների արդյունքների հրապարակմամբ։ Վեց տարբեր տնտեսական սեկտորներում կատարված այս հարցումը երևան է հանում հասարակության պատկերացումները հումանիտար հիմնախնդիրների, առաջնահերթությունների և հաշվետվողականության վերաբերյալ։ Քննարկման մասնակիցները վերլուծում են համաշխարհային հումանիտար «կիզակետերի» աշխարհագրությունը և քննարկում, թե ինչ պետք է անել այդ շրջաններին արդյունավետ օգնություն հատկացնելու համար։
Երրորդ թեման է` կանանց դերը միջազգային մարդասիրական համայնքում: ՄԱԿ-ում ԱՄՆ նախկին դեսպան, ԱՄՆ Ազգային անվտանգության խորհրդի ղեկավարի նախկին տեղակալ Նենսի Սոդերբերգի նախագահությամբ նիստը կընթանա միջազգային մարդասիրական համայնքի՝ լայն և տարաբնույթ փորձ ունեցող բացառիկ կին ներկայացուցիչների մասնակցությամբ։ Նիստի ընթացքում գնահատական կտրվի կանանց ներդրմանը մարդասիրական գործին և այն դերին, որոնք վերջիններս կարող են կատարել իբրև սոցիալական փոփոխության գործոն։
Aurora Dialogues քննարկումներն ընթանում են Մեսրոպ Մաշտոցի անվան հին ձեռագրերի գիտահետազոտական ինստիտուտում (Մատենադարան), որում ամփոփված է պատմության, փիլիսոփայության, բժշկության և բազում այլ ասպարեզներ ընդգրկող միջնադարյան ձեռագրերի և գրքերի ամենահարուստ հավաքածուներից մեկն աշխարհում։
