ԵՐԵՎԱՆ, 22 ապրիլի — Sputnik. Հայտնի օպերային երգչուհի, «Ավրորա» մրցանակի գեղարվեստական խորհրդի անդամ Հասմիկ Պապյանը կվարի «Ավրորա» մրցանակի հանձնման արարողությանը:
Նա այդ երեկոյի ժամանակ կկատարի նաև Բարսեղ Կանաչյանի «Օրորը»:
«Մենք ուրիշ ելույթ էինք նախատեսել ինձ համար, բայց քանի որ տեղի ունեցան ապրիլյան դեպքերը, ես չկարողացա պատկերացնել, որ մեր որոշած երգը կարող եմ երգել: Կուզենայի որևէ աղոթք կատարել, բայց քանի որ եկեղեցի չէ, Մարզահամերգային համալիրն այն վայրը չէ, որտեղ կարելի է «Ավե Մարիա» երգել, որոշեցի Բարսեղ Կանաչյանի օրորոցայինը երգել, օրոր ասել մեր մանուկներին, որոնք դեռ պիտի ծնվեն և քայլեն դեպի ապագա, ինչ-որ ձևով նաև մխիթարության խոսք ասել մեր զոհված զինվորների ծնողներին, հարազատներին: Դժվար է խոսքեր գտնել: Մենք նրանց կողքին ենք և հասկանում ենք այդ վշտի ծանրությունը»,-նշել է երգչուհին Արմենպրեսին տված հարցազրույցում:
Պապյանի խոսքով`ինքը շատ է հավանում «Ավրորա» մրցանակի գաղափարը:
«Շատ եմ հավատում նման նախաձեռնությունների, որոնք առաջ են նայում, դեպի ապագան են միտված, որոնք մեզ հնարավորություն են տալիս մի քիչ այլ ձևով նայել մեր անցյալին: Այս դեպքում «Ավրորա» մրցանակի հիմքում ընկած է հաղթած ժողովրդի գաղափարը, որը ցեղասպանություն է տեսել, վերապրել է դա և կարողացել է ինքնահաստատվել, այնպիսի աստիճանի հասնել, որ կարող է մի ուրիշ ցեղասպանության ենթարկվողի ձեռք մեկնել, տալ մրցանակ, քաջալերել իր օրինակով, ինչպես նաև երախտապարտ լինել այն երկրներին, քաղաքացիներին, ովքեր մեզ են օգնել 100 տարի առաջ»,-նշեց նա:
Նշենք, որ Մարզահամերգային համալիրում ապրիլի 24-ին Հայաստանի պետական երիտասարդական նվագախումբը «Ավրորա» մրցանակի հանդիսավոր հանձնման արարողության ժամանակ կատարելու է հայ կոմպոզիտորների ստեղծագործություններից, ներկայացվելու են հատվածներ Ավետ Տերտերյանի 3-րդ, Արամ Խաչատրյանի 2-րդ սիմֆոնիաներից, Շառլ Ազնավուրի երգերից:
««Ավրորա» մարդասիրական համաշխարհային մրցանակն ամեն տարի շնորհվելու է նրան, ով անձնվիրաբար օգնում է մարդկանց։ Դափնեկիրները ճանաչման են արժանանալու իրենց արարքների բացառիկ ազդեցության և նշանակության համար։ Դափնեկիրն ստանալու է 100 հազար ԱՄՆ դոլարի պարգև և նվիրատվության շղթան շարունակելու հնարավորություն՝ 1 միլիոն ԱՄՆ դոլարի դրամաշնորհի ներկայացնելով իրեն ոգեշնչած մարդասիրական կազմակերպություններին»,- ասված է հաղորդագրությունում։
