ԵՐԵՎԱՆ, 22 ապրիլի — Sputnik. Աշխարհահռչակ շանսոնիե Շառլ Ազնավուրին Sputnik Արմենիայի թղթակիցներն ուրբաթ հանդիպեցին Երևանի կենտրոնում գտնվող ռեստորաններից մեկում։ Ազնավուրը լուսանկարվեց «հաջողության ջենտլմենների» հետ ու հայկական ավանդական ուտեստներ ճաշակեց։
Հայկական ժողովրդական երաժշտության հնչյունների ներքո խաղողի վազերով շրջապատված տաղավարում հայկական ուտեստներ ճաշակելուց հետո ռեստորանից դուրս գալիս Ազնավուրը հրաժարվեց պատասխանել մեր հարցերին և ի պատասխան ձեռքով անելով` հեռացավ։
Փոխարենը ռեստորանի աշխատակիցները պատմեցին, որ Ազնավուրի այցն իրենց համար էլ էր անսպասելի։
«Նախապես գիտեինք, որ ինչ-որ առանձնահատուկ հյուրեր ենք ունենալու, բայց չէինք էլ ենթադրում, որ հենց իրեն պիտի սպասարկենք»,- մեզ հետ զրույցում ասացին ռեստորանի աշխատակիցները։
«Այն, որ նա չմերժեց մեր խնդրանքը, համաձայնեց մեզ հետ նկարվել, մեզ համար արդեն մեծ պատիվ է»,- ասաց մեր զրուցակիցը` հավելելով, որ այլ խնդրանքներով կամ հարցերով իրենց հյուրին չեն ձանձրացրել։
Նա հայտնեց նաև, որ իրենք փորձել են հնարավորինս քիչ մոտենալ սեղանին, անգամ հատուկ ուշադրություն չցուցադրել, որ «մեր հյուրն իրեն հանգիստ զգա»։
Հեռանալիս Ազնավուրը շնորհակալություն է հայտնել անձնակազմին ու խոստացել վերադառնալ։
