ԵՐԵՎԱՆ, 15 մարտի — Sputnik. Ուշ երեկոյան միաձայն ընդունվեց Սիրիայում քրիստոնյաների և այլ կրոնական խմբերի, քրդերի, ասորիների և այլ ազգերի մասսայական սպանությունները Ցեղասպանություն, մարդկության դեմ ուղղված հանցագործություն և ռազմական հանցագործություն որակելու վերաբերյալ բանաձևը: Բանաձևը տեքստը հիմնականում անհասցե է, և նշված է, որ այն անձինք ու ուժերը, որոնք իրականացրել են այս ոճիրը՝ պետք է պատժվեն Ցեղասպանության հանցագործության կանխարգելման ու պատժի մասին ՄԱԿ-ի 1948 թվականի կոնվենցիայի դրույթների համապատասխան, Ֆեյսբուք սոցիալական ցանցի իր էջում գրել է միջազգայնագետ Սուրեն Սարգսյանը:
«Եթե առաջին բանաձևը մեղմ ձևակերպումներով և դեկլարատիվ բնույթ կրող փաստաթուղթ է, ապա երկրորդը հստակ հասցեատեր ունի և շատ կոշտ է շարադրված: Այս բանաձևով ԱՄՆ-ի կոնգրեսը միջնորդություն է ներկայացնում ԱՄՆ նախագահին` ՄԱԿ-ում իր դեսպանի միջոցով հասնել Սիրիայի համար ՄԱԿ ժամանակավոր ռազմական տրիբունալի ստեղծմանը: Ըստ բանաձևի` Սիրիայում տեղի ունեցած արյունալի իրադարձությունների հիմնական մեղավորներն են Սիրիական իշխանությունները, Ռուսաստանը, Իրանը և Հզբոլլահը, որոնց գործողությունների արդյունքում են եղել զոհեր են եղել խաղաղ բնակչության շրջանում»,- գրել է Սարգսյանը:
Ըստ նրա`երկու փաստաթղթերը չափազանց կարևոր են, քանի որ ուրվագծում են Սիրիայի նկատմամբ ամերիկյան քաղաքականության հիմնական ուղենիշները: Հատկանշական է, որ երկու բանաձևում էլ Թուրքիան՝ որպես իրադարձությունների անմիջական մասնակից կամ պատասխանատու կողմ ներկայացված չէ:
Միջազգայնագետի կարծիքով` ընդհանուր առմամբ բանաձևերը լուրջ ուսումնասիրման կարիք ունեն։ «Վստահ եմ, որ մոտ ապագայում նման նախաձեռնությունների շատ կլինեն»,- գրել է Սարգսյանը:
