ԵՐԵՎԱՆ, 27 փետրվարի- Sputnik. Օրեցօր աճում է այն քաղաքացիների թիվը, որոնք բողոքում են, որ իրենց իրավունքները ոտնահարվում են, հաշվիչները սխալ թվեր են ցույց տալիս, կամ համապատասխան աշխատողները սխալ ցուցմունքներ են վերցնում հաշվիչներից, լրագրողներին ասաց «Սպառողների խորհրդատվության կենտրոն» ՀԿ-ի ղեկավար Կարեն Չիլինգարյանը:
«ՀԷՑ-ը ոտնահարում է սպառողների իրավունքները: Կրկնակի սակագնով հաշվիչներն աշխատում են երեք ժամ շեղումով: Այդ մասին ես ասել եմ դեռ անցյալ տարվա հոկտեմբերին»,- ասաց նա:
Չիլինգարյանի խոսքով՝ ինքը և փորձագիտական խումբը դիտարկում են անցկացրել այն ժամանակ և այս տարի, սակայն հաշվիչների ցուցմունքները չեն փոխվել:
Չիլինգարյանն անցյալ տարի դիմել է Հանրային ծառայությունները կարգավորող հանձնաժողով՝ առաջարկելով դիտարկում անցկացնել:
«Արդյունքում ՀԾԿՀ-ում ասացին, որ դիտարկում անցկացնելը նպատակահարմար չէ: Ինչպես ցանկացած էլեկտրոնային գրաֆիկի ցուցանիշների դեպքում, հաշվիչների ժամանակային ցուցմունքը շտկման կարիք ունի»,- ասաց Չիլիգարյանը:
Նա հավելեց, որ էլեկտրոնային հաշվիչները պետք է ամեն տարի պարտադիր ստուգել, բայց համապատասխան կառույցը դրանով չի զբաղվում:
