ԵՐԵՎԱՆ, 27 փետրվարի — Sputnik. Ըստ նախնական տվյալների` Իրանի Մեջլիսի հայ պատգամավորներն են Կարեն Խանլարյանը (հյուսիսային ընտրատարածքում) և Ժորժ Աբրահամյանը (հարավայինում), հայտնում է Tert.am-ը` հղում անելով Կարեն Խանլարյանին:
Խանլարյանը հայտնեց, որ ինքը հյուսիսային ընտրատարածքում հավաքել է ձայների 74%-ը, 26%-ը բաշխվել է մյուս երկու թեկնածուների միջև:
Հարավային ընտրատարածքում Ժորժ Աբրահամյանը պայքարել է միայնակ, քանի որ մյուս թեկնածուներն ինքնաբացարկ են ներկայացրել:
«Հայ համայնքի կողմից ընտրություններին բավականին լավ մասնակցություն է եղել՝ մոտ 12 հազար իրանահայ է մասնակցել: Նախորդ խորհրդարանական ընտրությունների հետ համեմատած` պատկերը գրեթե նույնն է, ընդամենը մի քանի տասնյակի տարբերություն կա»,-ասաց նա:
Կարեն Խանլարյանը նաև տեղեկացրեց, որ ընդհանուր առմամբ ողջ Իրանում ընտրություններին մասնակցության թիվը բարձր է եղել՝ ընտրելու իրավունք ունեցող 55 մլն քաղաքացիներից 31 մլն-ը մասնակցել է ընտրություններին:
Նշենք, որ Իրանում Մեջլիսի 290 տեղի համար պայքարում էր 5 հազար թեկնածու։
