ԵՐԵՎԱՆ, 12 հունվարի — Sputnik. Հանրապետական կուսակցությունից ԱԺ պատգամավոր Մարգարիտ Եսայանը չի կարծում, որ մարդու իրավունքների պաշտպան Կարեն Անդրեասյանի վրա ճնշումներ են եղել։
Հայաստանի օմբուդսմեն Կարեն Անդրեասյանի հրաժարականի կապակցությամբ առաջին օմբուդսմեն Լարիսա Ալավերդյանը կարծիք էր հայտնել, որ դա Հանրապետական կուսակցության որոշ անդամների կողմից ճնշումների հետևանք է։
«Կարեն Անդրեասյանն այն գործիչը չէ, որի վրա հնարավոր լինի որևէ ճնշում գործադրել, նա կամային բարձր հատկանիշներ ունի, պրոֆեսիոնալ է, հույս ունեմ, որ առաջիկայում կպարզվեն պատճառները»,- Sputnik Արմենիայի հետ զրույցում ասաց Եսայանը։
Պատգամավորը նշեց, որ ծանոթ չէ հրաժարականի մանրամասներին, բայց ցավով է իմացել Անդրեասյանի հրաժարականի մասին։
«Ափսոսում եմ, որ հրաժարական է տվել, որովհետև ես իրեն համարում եմ հանրապետության լավագույն իրավաբաններից մեկը և շատ հեռանկարային պետական գործիչ, մասնագետ։ Նա լավ օմբուդսմեն էր, նա իր տեղում էր և շատ լավ էր աշխատում»,- ասաց Եսայանը։
Հիշեցնենք, որ Կարեն Անդրեասյանը մարդու իրավունքների պաշտպանի պարտականությունները ստանձնել էր 2011 թվականի մարտի 3-ից: Նա իրավաբանական գիտությունների թեկնածու է, Երևանի պետական համալսարանի դոցենտ և ՀՀ փաստաբանների պալատի անդամ:
