ԵՐԵՎԱՆ, 21 դեկտեմբերի – Sputnik. Քննությունը չպետք է հիմնվի միայն Վալերի Պերմյակովի ցուցմունքների վրա, որոնք բավական կասկածելի են, կարծում է Ավետիսյանների ընտանիքի իրավահաջորդների փաստաբան, «Հելսինկյան քաղաքացիական ասամբլեայի» Վանաձորի գրասենյակի ղեկավար Արթուր Սաքունցը։
Ավետիսյանների ընտանիքի սպանության գործով ռուս զինծառայող Վալերի Պերմյակովի դատական առաջին նիստը տեղի ունեցավ Գյումրու 102-րդ ռուսական ռազմակայանի տարածքում։
Նիստը հետաձգելու մասին որոշումն ընդունվել էր` հաշվի առնելով հասարակական փաստաբան Էդուարդ Աղաջանյանի` գործի նյութերին ծանոթանալու խնդրանքը։ Հաջորդ նիստը տեղի կունենա հունվարի 18-ին` ժամը 12.00-ին:
«Բացի Պերմյակովից այլ ցուցմունքներ, որոնք վկայում են այն մասին, որ նա եղել է Ավետիսյանների տանը, և այն մասին, որ նա թաքնվել է տանը, քննությունը չունի։ Եթե նման ցուցմունքներ չկան, ինչու՞ քննությունը պետք է հիմնվի Պերմյակովի խոսքերի վրա», – ասել է Սաքունցը։
Նա նաև դժգոհություն հայտնեց դատական նիստի անցկացման վայրի և որակի վերաբերյալ` նշելով, որ պաշտպանող կողմը պահանջելու է, որպեսզի նիստը տեղափոխվի հայկական դատարաններից մեկը։
«Մենք ենթադրում ենք, որ հիմա մենք դրանք չենք հրապարակի։ Դատավորը նույնիսկ թույլ չտվեց մեզ միջնորդություն ներկայացնել դատական նիստի անցկացման վայրը փոխելու մասին։ Իսկ այն պայմաններում, որոնցում անցնում է դատական նիստը, հայտարարել դրա մասին, նշանակում է բացել բոլոր խաղաքարտերը, ինչը ես չեմ պատրաստվում անել», – ասել է Սաքունցը։
Ընդ որում իրավահաջորդը նշել է, որ բուն գործի շրջանակներում շատ հարցեր կան, որոնք չունեն պատասխան։ Նրա խոսքով` բոլոր այդ գործոնները հաշվի առնելով` հասարակության վերաբերմունքը դատավարության նկատմամբ բավական հոռետեսական է, այն չի ակնկալում ստանալ բոլոր հարցերի պատասխանները։
