ԵՐԵՎԱՆ, 18 դեկտեմբերի- Sputnik. Ավետիսյանների ընտանիքի սպանության մեջ մեղադրվող Վալերի Պերմյակովը աղանդավոր է և չի կարող սատանիստ լինել, Sputnik Արմենիա պորտալին ասաց Քայքայիչ պաշտամունքներից տուժածների օգնության և վերականգնողական կենտրոնի ղեկավար Ալեքսանդր Ամարյանը։
«Պերմյակովը խարիզմատիկ եկեղեցու ներկայացուցիչ է, նրա հայրն ու մայրը այդ եկեղեցու պաստորներ են, ուստի նա չի կարող սատանիստ լինել։ Այն, որ նա աղանդավոր է, փաստ է։ Իսկ որ սատանիստ է, դեռ պետք է ապացուցել։ Աղանդավորի երեխան, որը ավետարան և աստվածաշունչ է կարդում, չի կարող սատանիստ լինել»,- բացատրեց Ամարյանը։
Նա նշեց, որ սատանիստ ճանաչելու դեպքում զինծառայողի վերաբերյալ նախկինում կազմած բոլոր բնութագրերը չեն համապատասխանի իրականությանը։
«Եթե նրանք հաստատեն, որ Պերմյակովը սատանիստ է, ապա պետք է ամբողջությամբ վերանայեն բոլոր բնութագրերը, որոնցում բազմաթիվ անգամ նշվում է, որ «նա լավն է, հնազանդ» և այլն»,- ասաց փորձագետը։
«Հաշվի առնելով այն, որ Պերմյակովը 2013թ.-ին անչափահաս էր, նա կարող էր ինչ ասես գրել։ Դա անլուրջ է»,- եզրափակեց Ամարյանը։
Փաստաբանները վերոհիշյալ փաստը ներկայացրել են որպես միջնորդություն` գործի նյութերում ներառելու համար։
Գյումրիում, որտեղ տեղակայված է 102-րդ ռուսական ռազմակայանը, հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։
