ԵՐԵՎԱՆ, 2 դեկտեմբերի — Sputnik. «Նոր Հայաստան» ընդդիմադիր ճակատի կազմակերպած հանրահավաքը, որը մեկնարկել էր Ազատության հրապարակում, այնուհետև վերածվել երթի, ավարտվեց կրկին Ազատության հրապարակում:
Որոշակի պահի իրավիճակը սրվեց, երբ հավաքի կազմակերպիչները փորձեցին բարձրախոսներ տեղադրել ՀՀԿ-ի շենքի մոտ՝ պատճառաբանելով, որ դրանք պետք են ցուցարարներին կառավարելու համար, սակայն ոստիկաններն արգելեցին նրանց:
«Նոր Հայաստան» ճակատի նախաձեռնած երթի մասնակիցները շարժվեցին Ազատության հրապարակ և որոշեցին իրենց բողոքն արտահայտել շուրջօրյա նստացույցների միջոցով:
Ազատության հրապարակն այս պահին այնքան էլ մարդաշատ չէ, որովհետև տեղացող անձևի պատճառով շատերը ցրվեցին: Սակայն ակցիայի մասնակիցները պնդում են, որ վրաններ են տեղադրելու և իրենց անհնազանդությունն են արտահայտելու մինչև հանրաքվեի անցկացման օրը:
Հայաստանի նախագահ Սերժ Սարգսյանի ստորագրած հրամանի համաձայն` սահմանադրական բարեփոխումների հանրաքվեն կանցկացվի դեկտեմբերի 6-ին։ Հայաստանի ԱԺ պատգամավորներն ընթացիկ տարվա հոկտեմբերի 5-ին կողմ էին քվեարկել սահմանադրական բարեփոխումների նախագծին, որը փաստացի նախատեսում է անցում կատարել կառավարման խորհրդարանական կարգի։
