ԵՐԵՎԱՆ, 1 դեկտեմբերի — Sputnik. «Նոր Հայաստան» ընդդիմադիր ճակատի և ոստիկանների միջև բախում տեղի ունեցավ: Իրավիճակը շարունակում է լարված մնալ:
Ըննդդիմության ներկայացուցիչները հասան ՀՀԿ-ի շենքի մոտ և որոշեցին այդտեղ կանգ առնել: Շարժման առաջնորդները փորձեցին բարձրախոսներ տեղադրել, սակայն ոստիկանությունն արգելեց նրանց:
Ընդդիմության միասնական շտապի ղեկավար Ժիրայի Սեֆիլյանը հայտնեց, որ իրենք ցանկանում էին բարձրախոսներ տեղադրել, որպեսզի կարողանան կառավարել ցուցարարնեին: Ոստիկանությունն էլ իր հերթին հորդորեց պահպանել հասարակական կարգն ու զերծ մնալ սադրանքներից:
«Նոր Հայաստան» ճակատը միավորում է մի քանի ընդդիմադիր գործիչների: Նրանք դեմ են առաջիկա սահմանադրական փոփոխություններին, որոնք նախատեսում են անցում կատարել կառավարման խորհրդարանական կարգի:
Ոստիկանությունը հայտարարություն է տարածել, որում ասվում է, որ 2015թ.-ի դեկտեմբերի 1-ի հավաքն ընթանում է օրենքի խախտումներով: Հավաքի կազմակերպիչներն իրենց կողմից ներկայացված և ի գիտություն ընդունված երթուղուց շեղվելով, «մեր քաղաքում ազատ քայլելու» և համանման այլ պատճառաբանություններով շարժվել են դեպի երթի իրազեկմամբ չնախատեսված Մելիք-Ադամյան փողոց և արգելափակել հարակից Հանրապետության փողոցի երթևեկությունը:
ՀՀ ոստիկանությունն իր լիազորությունների սահմաններում կասեցրել է անօրինական երթը, հորդորել երթի կազմակերպիչներին հետևել իրազեկմամբ նախանշված երթուղուն: ՀՀ ոստիկանությունը փաստում է, որ նախատեսված հավաքների առաջին իսկ օրից, հավաքի կազմակերպիչները, անտեսելով ՀՀ ոստիկանության նախապես տարածված հայտարարության մեջ տեղ գտած ողջախոհության և օրինապահության կոչերը, ձեռնարկել են իրավիճակը լարելուն և ոստիկանների հետ բախումներ հրահրելուն ուղղված սադրիչ գործողություններ:
ՀՀ ոստիկանությունը հավաքի կազմակերպիչներին և, մասնավորապես, Րաֆֆի Հովհաննիսյանին և Ժիրայր Սեֆիլյանին հերթական անգամ սթափության կոչ է անում և պահանջում նման բազմամարդ միջոցառումներում ձեռնպահ մնալ ինչպես հավաքի մասնակիցների, այնպես էլ ՀՀ ոստիկանության աշխատակիցների անվտանգությանը սպառնացող իրավիճակներ ստեղծելուց:
Ոստիկանությունը շեշտում է, որ նման գործողությունների արդյունքում առաջացած հետևանքների համար ողջ պատասխանատվությունը կրելու են հավաքի կազմակերպիչները:
