ԵՐԵՎԱՆ, 8 հոկտեմբերի – Sputnik. Ռուսական «Տրանսաերո» ավիաընկերությունն ամբողջությամբ մարել է Ակտաու քաղաքի օդանավակայանին ունեցած պարտքը, որն ավելի վաղ հրաժարվել էր ծառայություններ մատուցել մինչև պարտքի մարումը, հաղորդում է Նովոստի–Ղազախստան ԼԳ–ն` հղում անելով օդանավակայանի տնօրեն Երղազի Ժոլդասովին։
«Տրանսաերո» ինքնաթիռը պետք է կատարեր «Ակտաու–Մոսկվա» չվերթը հոկտեմբերի 7–ի առավոտյան, սակայն թռիչքը հետաձգվել է ավելի քան մեկ օրով։ Ավելի վաղ Ժոլդասովը հայտնել էր, որ Ակտաու օդանավակայանը հրաժարվել է սպասարկել ինքնաթիռը 10 մլն տենգե պարտքի պատճառով։ Պաշտոնական կայքում տեղադրված պաշտոնական տեղեկության համաձայն` այս պահին չվերթի գրանցում է հայտարարվել։
«Կարծում եմ, որ մեկ ժամից օդ կբարձրանան, հենց որ պատրաստ լինի։ Մեր ներկայացրած 10 միլիոն տենգեի պարտքը նրանք վճարել են»,– ասել է Ժոլդասովը հեռախոսով։
«Տրանսաերոյի» ուղևորափոխադրումների պարտավորությունները ստանձնել են հիմնականում «Աերոֆլոտ» խմբի ավիաընկերությունները։ Ավելի վաղ հոկտեմբերի 7-ից սեփական չվերթերով «Տրանսաերոյի» ուղևորափոխադրումներն իրականացնում է «Սիբիր» ավիաընկերությունը (ապրանքանիշը` S7 Airlines)։
