ԵՐԵՎԱՆ, 8 հոկտեմբերի– Spuntik. Երևան քաղաքի ավագանին հինգշաբթի Էրեբունի-Երևան 2797 տոնին ընդառաջ արտահերթ նախատոնական նիստում հաստատեց Երևանի պատվավոր քաղաքացու կոչումներ շնորհելու որոշման նախագծերը:
Երևանի նոր պատվավոր քաղաքացիների կոչում կշնորհվի կոմպոզիտոր Երվանդ Երզնկյանին, բռնցքամարտիկ Արթուր Աբրահամին, երգչուհի Ռաիսա Մկրտչյանին և երգիչ Ռուբեն Մաթևոսյանին։
«Էրեբունի-Երևանն» ամեն տարի նշվում է հոկտեմբերի երկրորդ շաբաթ և կիրակի օրերին, այս տարի այն կտոնվի հոկտեմբերի 10-ին և 11-ին:
Հոկտեմբերի 10-ին՝ «Էրեբունի-Երևան 2797» տոնակատարության առաջին օրը, տեղի կունենան մի շարք միջոցառումներ, որոնց թվում՝ նաև ավանդական դարձած ժողովրդական արվեստի գործերի, ազգային խաղերի և տարազների ու խոհանոցի ցուցակացրություն-տոնավաճառը՝ Էրեբունի փողոցում։ Տոնական առաջին օրը կամփոփվի «Երևանում տոն է» խորագրով համերգով։
«Էրեբունի-Երևան 2797»-ին տոնական շքերթի են դուրս գալու նաև փողային նվագախմբերը՝ Թումանյան փողոցից քայլերթով շարժվելով դեպի քաղաքապետարան։
