ԵՐԵՎԱՆ, 28 սեպտեմբերի – Sputnik. Ռուսաստանը, Սիրիան, Իրանն ու Իրաքը միավորել են ջանքերը «Իսլամական պետություն» արմատական խմբավորման դեմ արդյունավետ պայքար մղելու համար և ստեղծել են հատուկ տեղեկատվական կենտրոն Բաղդադում իրականացվող գործողությունները համակարգելու համար
Բաղդադում տեղեկատվական կենտրոնի ստեղծման հիմնական գործառույթները կդառնան մերձարևելյան տարածաշրջանում ստեղծված իրադրության մասին ընթացիկ տվյալների հավաքումը, մշակումը, ընդհանրացումն ու վերլուծումը` գրոհայինների դեմ պայքարի համատեքստում։
Ռուսաստանն իր ձեռքն է վերցնում նախաձեռնությունը
Սիրիայում ռուսական զինուժի ակտիվացումից հետո ավելի ու ավելի մեծ թվով փորձագետներ են սկսել խոսել այն մասին, որ ԱՄՆ–ն կորցնում է առաջնորդի դերը «Իսլամական պետություն» խմբավորման դեմ պայքարում։ Այս երևույթը պայմանավորված է նաև ամերիկացիների ձեռնարկած գործողությունների անարդյունավետությամբ։ Սիրական ընդդիմության պատրաստումն ու ռմբակոծությունները որևէ էական օգուտ չեն բերել իսլամիստների դեմ պայքարում։
Ինչպես գրում է New York Times–ը, ամերիկյան պաշտոնատար անձինք գիտեին, որ ռուսական սպաների խումբը գտնվել է Բաղդադում, սակայն նրանք ակնհայտորեն զարմացել են, երբ հայտարարվել է տեղեկատվական համատեղ կենտրոն ստեղծելու մասին։
«Նորավանք» գիտակրթական հիմնադրամի գործադիր տնօրեն Գագիկ Հարությունյանի խոսքով` ԱՄՆ–ն ընդամենը երեք շաբաթում գրավեց Իրաքը, այն դեպքում, որ ԱՄՆ նախագահ Բարաք Օբաման հայտարարել էր, որ ԻՊ–ի դեմ պայքարը կտևի երեք տարի։
Նրա խոսքով` շատ լավ է, որ Ռուսաստանը, Իրանը, Սիրիան ու Իրաքը համախմբել են ջանքերը և տեղեկատվական կենտրոն ստեղծել։ Դա հույս է տալիս, որ ԻՊ–ի դեմ պայքարը կդառնա քիչ, թե շատ արդյունավետ։
Իրական ուժերի պայմանավորվածությունը
Եթե դիտարկենք այն երկրների ցանկը, որոնք պայմանավորվել են համագործակցել Կենտրոնի շրջանակում, կարելի է նկատել, որ այդ ցանկում ներառվել են այն երկրները, որոնք ավելի շատ են շահագրգռված «Իսլամական պետության» շուտափույթ վերացման հարցում։
Ո՛չ ԱՄՆ–ն, ո՛չ Թուրքիան չեն պատրաստվում իրապես պայքարել նրանց դեմ։ Նույնը` Պարսից ծոցի երկրները։
Այս Կենտրոնը միավորել է «Իսլամական պետություն» խմբավորման վերացման հարցում շահագրգիռ պետություններին` Սիրիային և Իրաքին, որոնց տարածքների կեսը գրավել են գրոհայինները, ինչպես նաև` Իրանին, որի համար ԻՊ–ի գաղափարախոսությունն ու ընդլայնումը ոչ մի կերպ ընդունելի չէ ոչ գաղափարական, ոչ էլ աշխարհաքաղաքական տեսանկյունից։
Այսօրինակ տեսակետ ունի նաև ՀՀ ԳԱԱ Արևելագիտության ինստիտուտի տնօրեն Ռուբեն Սաֆրաստյանը։
Նրա խոսքով` Սիրիան, Իրանն ու Իրաքն այն երկրներն են, որոնք անմիջականորեն շահագրգռված են ԻՊ–ի դեմ ընդհանուր ճակատի ստեղծմամբ։
«Իսկ Ռուսաստանը շահագրգռված է, քանի որ ԻՊ–ն սպառնալիք է ներկայացնում այդ երկրին և քաղաքակրթությանը», – կարծում է Սաֆրաստյանը։
Փորձագետը նշում է, որ հաջորդ քայլը կարող է լինել համակարգող կենտրոնի ստեղծումը, որի գործունեության շրջանակում կխորանա «Իսլամական պետություն» խմբավորման զսպմանն ուղղված չորս երկրների համագործակցությունը
«Նաև չեմ բացառում, որ այդ կառույցին հետագայում կմիանան նաև այլ երկրներ», – նշում է Սաֆրաստյանը։
Նա կարծում է, որ չարժե թերագնահատել առաջին հայացքից անտեսանելի դիվանագիտական քայլերի դերը, քանի որ վերջին ամիսների ընթացքում իրականացվել է լուրջ նախապատրաստական դիվանագիտական անդրկուլիսյան աշխատանք։
«Կենտրոնի ստեղծումն այդ գործունեության արդյունքն է։ Մերձավոր Արևելքում Ռուսաստանի վարած քաղաքականությունը նախատեսում է ոչ միայն ռազմական տեխնիկայի տեղակայում, այլ նաև դիվանագիտական հարաբերություններ։ Ռուսաստանը փորձում է ընդլայնել սեփական գործունեության շրջանակները, ինչը կդառնա այդ երկրի քաղաքականության նոր փուլը Մերձավոր Արևելքում», – կարծում է Սաֆրաստյանը։
