Հայ փորձագետ. տեղեկատվական կենտրոնը կբարձրացնի ԻՊ–ի դեմ պայքարի արդյունավետությունը

ԵՐԵՎԱՆ, 28 սեպտեմբերի– Sputnik. «Իսլամական պետություն» արմատական խմբավորմանը հակազդելու նպատակով ստեղծված տեղեկատվական կենտրոնը կբարձրացնի այդ խմբավորման դեմ պայքարի արդյունավետությունը, Sputnik Արմենիա միջազգային տեղեկատվական կենտրոնում կայացած ասուլիսի ժամանակ ասաց «Նորավանք» գիտակրթական հիմնադրամի գործադիր տնօրեն Գագիկ Հարությունյանը։

Ավելի վաղ Ռուսաստանը համախմբել էր ջանքերը Սիրիայի, Իրանի և Իրաքի հետ` «Իսլամական պետություն» արմատական խմբավորման դեմ մղվող պայքարը համակարգելու համար։ Բաղդադում տեղեկատվական կենտրոնի ստեղծման հիմնական գործառույթները կդառնան մերձարևելյան տարածաշրջանում ստեղծված իրադրության մասին ընթացիկ տվյալների հավաքումը, մշակումը, ընդհանրացումն ու վերլուծումը` գրոհայինների դեմ պայքարի համատեքստում։ Կենտրոնի գործառույթներն են նաև տեղեկատվության բաշխումն` ըստ նշանակության և նշված երկրների գլխավոր շտաբերին տեղեկատվության օպերատիվ փոխանցումը։

«Կարծում եմ, որ շատ լավ է, որ Ռուսաստանը, Իրանը, Սիրիան ու Իրաքը համախմբել են ջանքերը և տեղեկատվական կենտրոն ստեղծել։ Դա հույս է տալիս, որ ԻՊ–ի դեմ պայքարը կդառնա քիչ, թե շատ արդյունավետ», – ասաց Հարությունյանն և ավելացրեց, որ ԻՊ–ի դեմ պայքարի նախկին ձևաչափը չլուծեց խնդիրը։

Նրա խոսքով` սա դրական քայլ է, որն ընդունվել է այդ թվում նաև Եվրոպայի կողմից, որտեղ ևս գիտակցում են, որ հակամարտության հետևանքները բումերանգի պես անդրադառնում են նաև նրանց։

«Հարյուր հազարավոր փախստականներ, հսկայական ծախսեր, հակամարտությունների հետևանքով այս ամենն ընկնում է Եվրոպայի ուսերին», – ասաց Հարությունյանը։

Տարբեր գնահատականով` Սիրիայում և Իրաքում ԻՊ–ի վերահսկողության տակ գտնվող տարածքները կազմում են մոտ 90 հազար քառակուսի կիլոմետր, ահաբեկիչները հայտարարել են, որ խալիֆայություն են ստեղծում` սեփական օրենքներով և իշխանության մարմիններով։ Ծայրահեղական կազմակերպության թվաքանակի մասին տվյալները ևս տատանվում են (50–200 հազար գրոհային)։