Օհանյան. հակամարտության գոտում լայնամասշտաբ մարտական գործողություններ չեն կանխատեսվում

ԵՐԵՎԱՆ, 19 սեպտեմբերի– Sputnik. Տարածաշրջանում լայնամասշտաբ գործողությունների հանգուցալուծումը տվյալ պահին հնարավոր չէ, ուրբաթ լրագրողներին հայտարարեց Հայաստանի պաշտպանության նախարար Սեյրան Օհանյանը` գնահատելով ընթացիկ ռազմաքաղաքական իրադրությունը։

Վերջին մի քանի շաբաթներին ադրբեջանական կողմը կանոնավոր կերպով գնդակոծում է Ադրբեջանին սահմանակից Տավուշի մարզի գյուղերը և շարունակում խախտել հրադադարի ռեժիմը ԼՂՀ–ն հետ շփման գծում։ Այդ սադրանքների հետևանքով կան սպանվածներ և վիրավորներ։

«Ընդհանուր առմամբ պետք է նշեմ հետևյալը. վերջին օրերին սահմանին լարվածությունը մի փոքր թուլացել է, բայց ոչ ինչպես նախորդ տարիներին։ Հայաստանի Զինված ուժերի ստորաբաժանումները և Արցախի բանակի զինծառայողները լիարժեք կատարում են իրենց առջև դրված խնդիրները»,– ասաց Օհանյանը։

Նրա խոսքով` Հայաստանի պաշտպանության նախարարությունն «ամեն օր պատրաստվում է պատերազմի»։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: —0-