Սերբ–հունգարական Հորգոշ սահմանամերձ քաղաքում անկարգություններ են գրանցվել, հայտնել է ՌԻԱ Նովոստիի թղթակիցը։ Փախստականները հունգարացի ոստիկանների ուղղությամբ քարեր և փայտեր են նետել, նրանք ի պատասխան ջրցան մեքենաներ են գործի դրել։
Ավելի վաղ միգրանտները փորձել են կոտրել սահմանի պատը, ոստիկանները արցունքաբեր գազ են կիրառել։
Փախստականները փորձել են կտրել–անցնել հունգարական սահմանը, և նրանց հետ բախումների հետևանքով 20 ոստիկաններ վնասվածքներ են ստացել։ Այդ մասին ՌԻԱ Նովոստիին են հայտնել Չոնգրադի մարզային ոստիկանությունում։ Դեպքի վայր են ուղղվել լրացուցիչ ուժեր, այդ թվում` ազգային հակաճգնաժամային կենտրոնի հատուկ ջոկատը։
Հունգարիայի իրավապահ մարմինների տվյալով` սահմանին կուտակվել է մոտ 5 հազար փախստական։ Նրանք ձգտում են Հունգարիայից Ավստրիա մտնել, այնտեղից` Գերմանիայի տարածք։
Հունգարիայում միգրացիոն նոր օրենսդրությունն ուժի մեջ է մտել սեպտեմբերի 15–ին։ Զգալիորեն խստացվել է սահմանային վերահսկողությունը, ինչպես նաև պատիժ է սահմանվել սահմանն անօրինական կերպով հատելու համար։
