Գիտնականները պատմել են, թե մարդու գիտակցությունը որքան է ապրում մահից հետո

ԵՐԵՎԱՆ, 11 սեպտեմբերի – Sputnik. Մեծ Բրիտանիայի Սաութհեմփթոնի համալսարանի մի խումբ հետազոտողներ մեծ փորձ են անցկացրել, որպեսզի մահից հետո գիտակցության առկայության գիտական ապացույց գտնեն։

Դոկտոր Սեմ Պարնիայի գլխավորությամբ անցկացված ուսումնասիրության արդյունքները հրապարակվել են Resuscitation բժշկական ամսագրում։ Փորձին մասնակցել է ավելի քան 2000 մարդ Մեծ Բրիտանիայից, ԱՄՆ–ից և Ավստրիայից։ Այդ բոլոր մարդկանց մոտ սրտի կարճաժամկետ կանգ է գրանցվել։

Նրանցից 40 տոկոսը հայտնել է, որ իրենց գիտակցությունը կլինիկական մահվան պահին արթուն է եղել։ Գիտնականները նշել են, որ մահից հետո մի քանի րոպե արթուն է եղել նաև այն մարդկանց գիտակցությունը, որոնց բժիշկները չեն կարողացել փրկել։

«Մենք գիտենք, որ ուղեղը չի կարող գործել, երբ սիրտը կանգնում է, և ուղեղն «անջատվում» է 20-30 վայրկյանի ընթացքում, սակայն մենք արձանագրել ենք, որ մարդը գիտակցում է այդ փաստը երեք րոպեների ընթացքում»,– պատմել է դոկտոր Պարնիան։ Սա գիտական կարևոր պահ է, կարծում է գիտնականը, քանի որ ավելի վաղ ենթադրվում էր, որ կլինիկական մահից հետո մարդկային ինքնագիտակցությունը չի աշխատում, այլ այն, ինչ նա պատկերացնում է, հալյուցինացիա է։

Գիտնականները վերլուծել են սրտի կանգ վերապրած 2060 հիվանդների ռեակցիան։ Նրանցից 330–ը ողջ են մնացել, իսկ ևս 140–ը պատմել են, որ հիշում են և գիտակցել են, որ իրենց վերակենդանացման օգնություն են ցուցաբերել։ Բժիշկները ծրագրում են խորացնել իրենց ուսումնասիրությունը։ Հուսանք, որ նրանք առաջիկայում կներկայացնեն իրենց հետազոտությունների արդյունքները։