Պետդեպ. ԱՄՆ–ն չի ճանաչում Լեռնային Ղարաբաղում անցկացվող ընտրությունների արդյունքները

ԵՐԵՎԱՆ, 11 սեպտեմբերի– Sputnik. ԱՄՆ–ն չի ճանաչում Լեռնային Ղարաբաղում անցկացվող ընտրությունների արդյունքները, լրագրողներին հայտարարել է պետդեպարտամենտի ներկայացուցիչ Ջոն Քիրբին։

Սեպտեմբերի 13–ին տեղի կունենան տեղական ինքնակառավարման մարմինների վեցերորդ ընտրությունները։ Տեղական ինքնակառավարման մարմինների առաջին ընտրությունները, այդ թվում` Ստեփանակերտի քաղաքապետի պաշտոնի, տեղի են ունեցել Ստեփանակերտում 1998թ.–ին։

«Հակամարտության լայնածավալ հանգուցալուծման համատեքստում մենք ճանաչում ենք Լեռնային Ղարաբաղի բնակչության դերը` իրենց ապագան որոշելու համար։ Սակայն ԱՄՆ–ն չի ճանաչում Լեռնային Ղարաբաղը որպես անկախ ինքնիշխան պետություն, և մենք չենք ճանաչում, որ սեպտեմբերի 13–ի այսպես կոչված ընտրություններն ազդում են տարածաշրջանի իրավաբանական կարգավիճակի վրա»,– ասել է Քիրբին։

Հինգշաբթի ամերիկյան արտաքին քաղաքական գերատեսչությունը հայտարարություն է տարածել, որում մեղադրել է Հայաստանի և Ադրբեջանի ուժերին սահմանամերձ շրջաններում միմյանց դեմ ծանր սպառազինություն օգտագործելու մեջ։ Պետդեպարտամենտը պահանջել է իրավիճակի լարվածության թուլացում, դատապարտել խաղաղ բնակչության շարքում զոհերը և կոչ արել Հայաստանի և Ադրբեջանի իշխանություններին կատարել ԵԱՀԿ Մինսկի խմբի շրջանակում ղարաբաղյան հակամարտության կարգավորման հարցով միջազգային պարտավորությունները։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան: —0-