«Բաբելոնյան աշտարակ»` Լոնդոնի խանութներից

ԵՐԵՎԱՆ, 10 սեպտեմբերի – Sputnik. Լոնդոնի V&A պատկերասրահում ներկայացվել է Բերնաբի Բարֆորդի «Բաբելոնյան աշտարակ» աշխատանքը։ Ճենապակուց պատրաստված 6 մետրանոց հսկա արձանը բաղկացած է 3000 դետալից, որոնք Լոնդոնի խանութների և բուտիկների մանրակերտներն են, հայտնում է vokrugsveta.ru կայքը։

«Չ՞է որ մենք բոլորս գնորդ ենք,– կատակում է Բարֆորդը։ – Ես կարծում եմ, որ մենք դադարել ենք քաղաքացի լինել և վերածվել ենք զուտ սպառողի։ Ես ցանկացել եմ ուսումնասիրել, թե ինչ խանութներ կան մեր քաղաքում»։

Արվեստագետը հեծանվով շրջել է Լոնդոնի բոլոր թաղամասերով, որպեսզի լուսանկարի խանութների ցուցափեղկերը, իսկ հետո դրանց հիման վրա ստեղծել է մակետներ։ Աշտարակի ներքևի մասում նա տեղավորել է հիմնականում լքված, չգործող խանութները, հավի մսի վաճառքի կետերը, ֆիքսված ապրանքային գներով խանութները և թերթի կրպակները։ Աշտարակի գագաթը «զարդարում» են էքսկլյուզիվ բուտիկները, պատկերասրահները և աճուրդի տները։

Ցանկացողները կարող են ձեռք բերել «Բաբելոնյան աշտարակի» իրենց հավանած ցանկացած դետալը։ Դրանց գները կախված են դասավորությունից` որքան բարձր է գտնվում խանութն, այնքան ավելի թանկ է այն պոտենցիալ գնորդի համար։ Գները տատանվում են 95-ից մինչև 6000 ֆունտ ստեռլինգի սահմաններում: Այսպիսով, ըստ հեղինակի մտահղացման, գնորդների առջև հարց է ծառանում, որի հետ մեզանից յուրաքանչյուրը` որպես գնորդ, բախվում է ամեն օր. գնումներն անհրաժեշտությու՞ն են, թ՞ե զուտ ցանկություն։

«Իմ աշխատանքի նպատակն է դիտողի մոտ քննադատական մտածողություն  ձևավորել և նրան դրդել` հակազդելու սպառման այս հիերարխիային», – նշում է Բարֆորդը։ «Բաբելոնյան աշտարակի» կայքում կարելի է մոտիկից ծանոթանալ աշտարակի դետալներին, սակայն գնել հնարավոր կլինի ոչ բոլոր մակետները` շուրջ 700 խանութ արդեն գնել են։ Իրենց տերերի մոտ դրանք կլինեն ցուցահանդես–վաճառքի ապամոնտաժումից անմիջապես հետո` նոյեմբերի 1-ին։