ԵՐԵՎԱՆ, 31 օգոստոսի– Sputnik Պորտուգալիայի փոքրիկ Կամպո Մայոր քաղաքի Ալենտեժու շրջանում օգոստոսի 22-30-ն անցկացվել է «Festas do Povo» ամենամյա ծաղիկների փառատոնը, հայտնում է econet.ru-ն։
Այս ամենամյա փառատոնին տեղի բնակիչները մեծ պատասխանատվությամբ են պատրաստվում։ Պորտուգալիայի Ալենտեժու շրջանի կենտրոնական փողոցները զարդարվում են տարբեր գույների և երանգների թղթերից պատրաստված ծաղիկների շղթաներով։ Ծաղիկները պատրաստում են տեղի բնակիչները։ Այս տարվա փառատոնի համար նրանք հազարավոր մետրերով թուղթ էին օգտագործել և ներկայացրել չորս ամսվա տաժանակիր աշխատանքի արդյունքը։ Գողտրիկ, սակայն շատ հաճելի պորտուգալական քաղաքը նմանվել էր իրական ծաղկային դրախտի։
Տեղի բնակիչները մրցումներ էին կազմակերպել պարզելու և պարգևատրելու համար ամենագեղեցիկ և անսովոր զարդարված փողոցը։ Բացի ծաղկաշղթաներից, թղթից պատրաստվել էին նաև լուսամփոփներ, բույսեր, թիթեռներ և թռչուններ, որոնք ավելի ուշ զարդարելու էին տների պատերը։
Ծաղիկների փառատոնը տեղի բնակչության համար իսկական ժողովրդական տոն է, քանի որ միջոցառմանը մասնակցում են բոլորը` առանց բացառության։ Պատկերացնելն անգամ բարդ է, թե որքան ջանք ու համբերություն են գործադրել տեղաբնակները այդ ծաղկային դրախտը ստեղծելու համար։ Սակայն վստահաբար կարելի է ասել, որ բնակիչների ջանքերն ապարդյուն չէին անցել. քաղաքն իսկապես աներևակայելի գեղեցիկ ու հեքիաթային էր դարձել։
