ԵՐԵՎԱՆ, 20 ապրիլի – Sputnik. Թուրքիայի նախագահ Ռեջեփ Թայիփ Էրդողանը, մեկնաբանելով դպրոցներում տեղի ունեցող զինված միջադեպերը, հայտարարել է, որ սոցիալական ցանցերը կործանարար ազդեցություն են ունենում երեխաների և դեռահասների վրա։ Նրա խոսքերը մեջբերում է ՌԻԱ Նովոստին։
«Որոշ հարթակներ վերածվում են իսկական «կոյուղու»՝ այլասերելով մեր երեխաների մտքերը»,-ասել է նախագահը կառավարության նիստից հետո ժողովրդին ուղղված ուղերձում։
Նրա խոսքով՝ թվային միջավայրն ավելի ու ավելի է դուրս մղում ավանդական շփումն ընտանիքում։
«Մենք հաճախ չենք պատկերացնում, թե ում հետ և ինչպես են շփվում մեր երեխաները վիրտուալ աշխարհում, երբ կողքի սենյակում են, իսկ ծնողների հետ անցկացրած ժամանակը զիջում է էկրանների առջև անցկացրած ժամանակին»,-նշել է Էրդողանը։
Նա ընդգծել է, որ թվային հարթակների ազդեցությունը դառնում է համակարգային. թվային ընկերները, ուսուցիչները և նույնիսկ «ծնողները» գնալով ավելի շատ են մասնակցում աճող սերնդի բնավորության ձևավորմանը, իսկ անվերահսկելի ինտերնետի և մանիպուլյատիվ ալգորիթմների համադրությունը չափազանց բարդ իրավիճակ է ստեղծում։
Նշենք, որ ապրիլի 14-ին Շանլիուրֆա նահանգի դպրոցներից մեկում զինված հարձակում էր տեղի ունեցել, որի հետևանքով մոտ 20 մարդ էր տուժել։ Հարձակվողը նախկին աշակերտն է եղել, նա ինքնասպանություն է գործել։
Ապրիլի 15-ին զինված միջադեպ տեղի ունեցավ նաև Ղահրամանմարաշի դպրոցներից մեկում։ Զոհվել է 9 մարդ՝ 8 աշակերտ և 1 ուսուցիչ։ Տուժել է 13 մարդ, որոնցից 6-ը վերակենդանացման բաժանմունքում են, ընդ որում 3-ը՝ ծայրահեղ ծանր վիճակում։ Հարձակվողը 8-րդ դասարանի աշակերտ է, որը ևս ինքնասպան է եղել։
Ներքին գործերի և ազգային կրթության նախարարների, նահանգապետների, ոստիկանության և ժանդարմերիայի ղեկավարների մասնակցությամբ կայացած խորհրդակցության արդյունքում, որի ընթացքում քննարկվել է ուսումնական հաստատությունների անվտանգությունը, որոշվել է երկրի յուրաքանչյուր դպրոցի պաշտպանությունն ապահովել առնվազն երկու ոստիկանով։ Անհրաժեշտության դեպքում պահպանությունը կուժեղացվի։