«Հայաստան» դաշինքն առաջարկում է ընդդիմադիր ուժերի միասնական հանրահավաք անցկացնել

ԵՐԵՎԱՆ, 15 ապրիլի – Sputnik. Հայաստանում ընդդիմադիր ուժերը պետք է մեկտեղեն իրենց ջանքերը օրվա իշխանության վերարտադրությունը կանխելու համար։ Այս մասին լրագրողների հետ ճեպազրույցում ասաց ԱԺ «Հայաստան» խմբակցության պատգամավոր Իշխան Սաղաթելյանը` նշելով, որ որպես լուծում «Հայաստան» դաշինքն առաջարկում է ընդդիմադիր ուժերի միասնական հանրահավաք անցկացնել։

Սաղաթելյանի խոսքով` քաղաքական ուժերի հետ ընդհանուր առմամբ կա փոխըմբռնում։ Նա ընդգծեց, որ իրենց խմբակցության առաջարկած լուծումը դա է։

Քաղաքական գործիչը վստահ է, որ շատ ընդդիմադիր ուժեր ընկել են Նիկոլ Փաշինյանի լարած թակարդը և չհամագործակցելու մասին պարբերաբար հայտարարություններ են անում, մինչդեռ այսօր միայն քաղաքական ուժերի միասնությունը կարող է կանխել իշխանության վերարտադրությունը։

Հիշեցնենք` ՀՀ–ում հերթական խորհրդարանական ընտրությունները կկայանան 2026 թվականի հունիսի 7-ին։

Մասնակցելու վերաբերյալ արդեն հայտարարել են ՀՀ 2–րդ նախագահ Ռոբերտ Քոչարյանը, Երևանի նախկին քաղաքապետ Հայկ Մարությանը` իր «Նոր ուժ» կուսակցությամբ, ՀԱԿ–ը, որի վարչապետի թեկնածուն Լևոն Զուրաբյանն է, «Հանրապետություն» կուսակցությունը` Արամ Սարգսյանի գլխավորությամբ։ «Ուժեղ Հայաստան» կուսակցությունը առաջիկա խորհրդարանական ընտրություններին կմասնակցի դաշինքով, որը կկոչվի «Ուժեղ Հայաստան Սամվել Կարապետյանի հետ»։ Ընտրություններին մասնակցելու է նաև ԲՀԿ–ն, որի առաջնորդ Գագիկ Ծառուկյանն իր «Առաջարկ Հայաստանին» ծրագիրն ուզում է «Նոյյան տապան» դարձնել ընդդիմադիր ուժերի համար։

«ՀայաՔվե» ազգային քաղաքացիական միավորումը և «Միասնության թևեր» քաղաքական նախաձեռնությունը ընտրություններին կմասնակցեն միասին։ Ընտրություններին մասնակցելու վերաբերյալ հայտարարել է նաև «Լուսավոր Հայաստան» կուսակցության ղեկավար Էդմոն Մարուքյանը։

Ապրիլի 4–ին իշխող «Քաղաքացիական պայմանագիր» կուսակցությունը միաձայն ընտրեց առաջիկա խորհրդարանական ընտրություններում վարչապետի իր թեկնածուին` Նիկոլ Փաշինյանին։