ԵՐԵՎԱՆ, 12 հունվարի – Sputnik. Նիդեռլանդներում ՀՀ դեսպան Վիկտոր Բիյագովը ՀՀ կողմից Հռոմի ստատուտի արդյունավետ կիրարկման հարցեր է քննարկել Միջազգային քրեական դատարանի նախագահ Պյոտր Հոֆմանսկիի, դատախազ Քարիմ Խանի և գլխավոր քարտուղար Օսվալդո Զավալայի հետ։ Տեղեկությունը հայտնում է Նիդեռլանդներում ՀՀ դեսպանությունը։
«Հանդիպումների ընթացքում քննարկվեցին ՀՀ կողմից Հռոմի ստատուտի արդյունավետ կիրարկմանը, դատարանի հետ համագործակցությանը, ինչպես նաև կարողությունների զարգացմանն ուղղված հնարավոր ծրագրերին առնչվող հարցեր»,–նշված է հաղորդագրության մեջ։
Զրուցակիցները ողջունել են Հայաստանի անդամակցությունը Միջազգային քրեական դատարանին։
Ընդգծվել Է, որ Հայաստանի կողմից Հռոմի կանոնադրության վավերացումը մեծ կարևորություն ունի միջազգային քրեական արդարադատության համընդհանուրացման և անպատժելիության դեմ պայքարի տեսանկյունից։