ԵՐԵՎԱՆ, 14 հուլիսի – Sputnik. Գարիկ և Արթուր Գալեյանների նկատմամբ հանրային քրեական հետապնդում է հարուցվել, հայտնում է ՀՀ քննչական կոմիտեի մամուլի ծառայությունը։ Վարույթը վերաբերում է 2022 թվականի հունիսի 30-ին ՀՀ գլխավոր դատախազության մոտ տեղի ունեցած միջադեպին։ ՔԿ–ից տեղեկացնում են, որ զոհված զինծառայողների ծնողների կողմից իրականացվող ակցիայի ժամանակ Գարիկ Գալեյանը և եղբայրը՝ Արթուր Գալեյանը, հասարակական կարգը կոպիտ խախտելու ուղղակի դիտավորությամբ, հասարակության նկատմամբ անհարգալից վերաբերմունք են ցուցաբերել։
Մասնավորապես, ըստ ՔԿ–ի, նրանք օգտագործել են այն առիթը, որ վավերագրական ֆիլմի նկարահանումների նպատակով դատախազության շենքի դիմաց գտնվող Դ․ Ս․-ն չի կատարում նկարահանումները դադարեցնելու պահանջները։ Ցուցարարների, լրագրողների, ոստիկանների մոտ նրան ստորացնելու նպատակով Գարիկ Գալեյանն իր ձեռքում գտնվող շշի պարունակությունը ցուցադրաբար լցրել է վերջինիս գլխին: Այնուհետև իր եղբոր և մի շարք անձանց հետ հայհոյանքներ և այլ անպարկեշտ արտահայտություններ է հնչեցրել, հարձակվել Դ. Ս․-ի վրա, պատռել նրա վերնաշապիկը, բազմաթիվ հարվածներ հասցրել վերջինիս մարմնի տարբեր մասերին։
«Արդյունքում խախտվել է մարդկանց անդորրը, իսկ Դ. Ստեփանյանին պատճառվել են առողջության թեթև վնասի հատկանիշներ չպարունակող մարմնական վնասվածքներ և ուժեղ ֆիզիկական ցավ»,– նշված է ՔԿ հաղորդագրության մեջ:
Գալեյան եղբայրների նկատմամբ հարուցվել է հանրային քրեական հետապնդում՝ ՀՀ քրեական օրենսգրքի 297-րդ հոդվածի (Խուլիգանություն) 2-րդ մասի 1-ին կետով և 195-րդ հոդվածի (Ֆիզիկական ներգործություն)1-ին մասով:
Գարիկ Գալեյանի նկատմամբ որպես խափանման միջոց է ընտրվել բացակայելու արգելքը։
Նախաքննությունը շարունակվում է։