ԵՐԵՎԱՆ, 1 հուլիսի – Sputnik. ԵՄ–ում դատապարտել են Ստոկհոլմում Ղուրան այրելու ակցիան և հորդորել են կանխել իրավիճակի սրացումը։ Այս մասին ասվում է Արտաքին կապերի եվրոպական ծառայության տարածած հայտարարության մեջ։
«ԵՄ–ն միանում է Շվեդիայի արտգործնախարարին` ամենավճռական կերպով դատապարտելով Ղուրան այրելու ակցիան։ Այդ գործողությունը որևէ կերպ չի արտացոլում ԵՄ–ի կարծիքը... Հիմա ժամանակն է, որ փոխըմբռնում և հարգանք դրսևորենք և խուսափենք ցանկացած հետագա էսկալացիայից»,– նշվում է փաստաթղթում։
Ցանկացած Սուրբ գիրք այրելը վիրավորանքի, հարգանքի բացակայության և սադրանքի դրսևորում է։ Փաստաթղթում ասվում է, որ նման գործողությունները տեղ չունեն Եվրոպայում, որը շարունակում է հանդես գալ դավանանքի և արտահայտվելու ազատության օգտին։
Ավելի վաղ Շվեդիայի ոստիկանությունը թույլատրել էր հունիսի 28-ին՝ Կուրբան բայրամ տոնի առաջին օրը, Ստոկհոլմի գլխավոր մզկիթի մոտ Ղուրան այրելու բողոքի ակցիա անցկացնել։ Վարչապետ Ուլֆ Յալմար Քրիստերսոնը հայտարարել էր, որ ոստիկանության որոշումը օրինական է, բայց ոչ տեղին: Նույն օրը տղամարդը, որը ենթադրաբար իրաքցի է, Ղուրանից էջեր էր պոկել և հրկիզել։ ԶԼՄ-ների տվյալներով՝ նրան հետևել էր մոտ 200 մարդ, ոմանք ի նշան բողոքի բղավել էին «Աստված մեծ է»։
Ստոկհոլմում Ղուրանի այրումն ու պղծումը աշխարհի մեծ արձագանք է ստացել մի շարք երկրներում։ Իրաքը Շվեդիայի իշխանություններից պահանջել է արտահանձնել ակցիան իրականացրած ներգաղթյալին՝ նրա նկատմամբ դատավարություն անցկացնելու համար, միևնույն ժամանակ հինգշաբթի օրը տասնյակ իրաքցիներ բողոքի ցույց են կազմակերպել Բաղդադում Շվեդիայի դեսպանատան մոտ։
Տեղի ունեցածը դատապարտել են նաև Ալժիրը, Աֆղանստանը, Եգիպտոսը, Ինդոնեզիան, Լիբանանը, Սիրիան, Թուրքիան, Ուզբեկստանը, Արաբական պետությունների լիգայի գլխավոր քարտուղար Ահմեդ Աբուլ Գեյթը և Պարսից ծոցի արաբական պետությունների համագործակցության խորհրդի գլխավոր քարտուղար Ջասեմ ալ–Բուդայվեն։