Դամասկոսի շրջակայքին հասցրած օդային հարվածների հետևանքով հայ համայնքը կորուստներ չի ունեցել։ Այս մասին Sputnik Արմենիային հայտնեց Հալեպում լույս տեսնող հայկական «Գանձասար» թերթի խմբագիր Զարմիկ Պողիկյանը։
Մարտի 31-ի լույս գիշերը քաղաքի հարավային թաղամասերին երկու ավիահարված է հասցվել։ Հիմնականում հարվածել են ռազմական օբյեկտներին, վիրավորում են ստացել սիրիացի զինծառայողները։
«Քաղաքում հրթիռներ չեն ընկել։ Հայ համայնքը կորուստներ չունի։ Խուճապ չկա քաղաքում, բայց մարդիկ զգուշավորություն են ցուցաբերում։ Անպաշտպան լինելու զգացում կա, թեև քաղաքացիական պաշտպանության միջոցներ են ձեռնարկվել», – ասաց Պողիկյանը։
Սիրայի մայրաքաղաքի հայկական համայնքը շարունակում է իր կենսագործունեությունը, հայկական կազմակերպությունները, վարժարանները, եկեղեցական առաջնորդարանն ու ազգային կենտրոններն աշխատում են անխափան, թեև մեր հայրենակիցների թվաքանակը մայրաքաղաքում համեմատաբար քիչ է, քան Հալեպում։ Նրանք պատերազմի հետևանքով ստիպված դիմագրավում են բազմաթիվ դժվարությունների։
Պողիկյանը նշում է, որ հարվածներ հասցրելով Դամասկոսի հարավային շրջանում տեղակայված սիրիական բանակի հենակետերին` Իսրայելը, ըստ էության, կատարում է ապօրինի գործողություններ։
Նշենք, որ վերջին տարիներին Սիրիայի հայ համայնքը զգալի կրճատվել է։ Նախկինում այնտեղ ապրում էր շուրջ 100 հազար մարդ, այսօր, ոչ պաշտոնական տվյալների համաձայն, 10-20 հազար է մնացել։