Քոչարյանի և Գաբրիելյանի հանդեպ խուլիգանություն անողներին մեղադրանք է առաջադրվել

ԵՐԵՎԱՆ, 13 դեկտեմբերի – Sputnik. Հանրային քրեական հետապնդում է հարուցվել իշխանական 2 պատգամավորների` Անդրանիկ Քոչարյանի և Սիսակ Գաբրիելյանի հանդեպ խուլիգանական գործողություններ կատարած անձանց նկատմամբ, տեղեկանում ենք դատախազությունից։

Մասնավորապես, Գ.Բ.-ն, 2020-ի դեկտեմբերի 28-ին` ժամը 09:00-ից մինչև 11:30-ն ընկած ժամանակահատվածում, մասնակցելով այդ օրերին կազմակերպվող հավաքներին, մի խումբ անձանց հետ խախտել է հասարակական կարգը, որը զուգորդվել է բռնության գործադրմամբ: Մասնավորապես, Գ.Բ.-ն հավկիթներով և ձնագնդիկներով հարվածներ է հասցրել Ազգային ժողովի շենքին մոտեցող պատգամավոր Անդրանիկ Քոչարյանին սպասարկող ծառայողական ավտոմեքենային, որի մեջ գտնվել է պատգամավորը: Դրանից հետո Գ.Բ.-ն բերման է ենթարկվել։

Այնուհետև, հավաքի մի խումբ մասնակիցներ ժամը 11:00-ի սահմաններում փակել են Դեմիրճյան փողոցի երթևեկելի հատվածը: Վերջիններիս միացած Ա.Ս.-ն և գործով չպարզված անձինք խոչընդոտել են աշխատանքի վայր ժամանող ԱԺ պատգամավոր Սիսակ Գաբրիելայնի երթևեկը, հնչեցրել անպարկեշտ արտահայտություններ:

Նշվում է նաև, որ Ա.Ս.-ն նույնպես բերման է ենթարկվել։

2022 թվականի դեկտեմբերի 12-ին Գ.Բ.-ի և Ա.Ս.-ի նկատմամբ հարուցվել է հանրային քրեական հետապնդում (համապատասխանաբար քրեական օրենսգրքի 297-րդ հոդվածի 2-րդ մասի 1-ին կետով՝ խուլիգանություն՝ մի խումբ անձանց կողմից և քրեական օրենսգրքի 195-րդ հոդվածի 1-ին մասով և 297-րդ հոդվածի 2-րդ մասի 1-ին կետով՝ խուլիգանություն՝ մի խումբ անձանց կողմից՝ հարվածներ հասցնելով կամ բռնի այլ գործողություններ կատարելով):