ԵՐԵՎԱՆ, 25 մայիսի - Sputnik. Ռուսաստանի նախագահ Վլադիմիր Պուտինը պետական պարգևներ է խոստացել մարտիկներին, որոնք վտանգում են իրենց կյանքն Ուկրաինայում հատուկ գործողության ընթացքում և ընդգծել է, որ նրանց պետք է վերաբերվել ինչպես հերոսների։
«Քիչ առաջ եղա պաշտպանության նախարարության հոսպիտալում, հանդիպեցի վնասվածքներից հետո բուժման կուրս անցնող մեր զինծառայողներին։ Եվ նրանցից ոմանք, համենայն դեպս, այն մարդկանց մեծ մասը, որոնց հետ խոսեցի, նույնիսկ պետական պարգևներ չունեն: Իհարկե, կունենան»,- ասել է նա Պետական խորհրդի նախագահության՝ սոցիալական հարցերին նվիրված նիստում։
Պուտինը նաև ընդգծել է, որ «անկախ նրանից, թե ինչ պետական պարգևներ կունենան կամ ունեն, այդ մարդիկ վտանգում են իրենց առողջությունն ու կյանքը՝ հանուն Դոնբասի մարդկանց ու երեխաների, հանուն Ռուսաստանի»:
«Նրանք հերոսներ են։ Հենց այդպե՛ս։ Յուրաքանչյուրն իր կյանքը մահվան վտանգի է ենթարկում։ Դա գիտակցաբար է անում։ Եվ նրանց պետք է հերոսների պես վերաբերվել», - ասել է նախագահը։
Վլադիմիր Պուտինը հանձնարարել է տեղական իշխանություններին աջակցել բոլոր այն զինծառայողների ընտանիքներին, որոնք մասնակցում են Ուկրաինայում հատուկ գործողությանը: Նա հույս է հայտնել, որ անկախ պետության կողմից ձեռնարկվող քայլերից, տեղական մակարդակով զինվորականների ընտանիքները շրջապատված կլինեն ուշադրությամբ ու հոգատարությամբ։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողությունները շարունակվում են արդեն 91-րդ օրը։