ԵՐԵՎԱՆ, 15 մայիսի – Sputnik. ԱԺ «Պատիվ ունեմ» խմբակցության ղեկավար, «Դիմադրություն» շարժման մասնակից Արթուր Վանեցյանը Ֆրանսիայի հրապարակում ընթացող հանրահավաքի ժամանակ հայտարարեց, որ իրենց շարժումը չի պառակտվել ու չի պառակտվելու։
«Մի քիչ հիվանդացել էի, իշխանական մամուլը սկսեց գրել, թե շարժումը տապալվել է, պառակտվել է, եկել եմ ասեմ, որ ծոծրակներդ կտեսնեք, բայց պառակտված շարժում չեք տեսնի»,- ասաց նա։
Նրա խոսքով՝ չի կարող պառակտվել մի բան, որը վերաբերում է հայրենիքին ու ժողովրդին։
Վանեցյանը նշեց, որ այսօր իր ելույթում ուզում էր անդրադառնալ Հայաստանի անվտանգության խնդիրներին, բայց հնարավոր չէ խոսել դրա մասին, քանի որ ներկայիս իշխանությունները քանդել են երկրի անվտանգության համակարգը։
«Մենք հիմա ունենք արտագաղթ, չունենք ներդրումներ, որովհետև չկան հստակ անվտանգային երաշխիքներ։ Իսկ սրանք միայն պարտվողական քաղաքականությունն են առաջ տանում։ Ասում են, եթե մենք գնանք՝ պատերազմ է լինելու։ Ժողովո՛ւրդ, սուտ են ասում»,-ասաց Վանեցյանը։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։ Ապրիլի 13-ին խորհրդարանում նա ափսոսանք հայտնեց, որ 2018-2019 թվականներին ժողովրդին չի ասել, որ «մեր բոլոր հեռու և մոտիկ բարեկամները մեզնից ակնկալում են, որ մենք այս կամ այն կոնֆիգուրացիայով Ադրբեջանին հանձնենք 7 հայտնի շրջանները և իջեցնենք Արցախի կարգավիճակի համար մեր սահմանած նշաձողը»։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։