ԵՐԵՎԱՆ, 7 մայիսի – Sputnik. Երեկ ոստիկանությունում տեղեկություններ են ստացվել, որ մի երևանցի՝ մոտ 50-ամյա Գ. Ե.-ն, պատրաստվում է մարմնական վնասվածք հասցնել ընդդիմության երեք ներկայացուցիչներին, գրում է «Առավոտը»։
Մասնավորապես, տղամարդը ցանկացել է վնասել ՀՀ երկրորդ նախագահ Ռոբերտ Քոչարյանի որդուն՝ Լևոն Քոչարյանին, ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանին և «Պատիվ ունեմ» խմբակցության ղեկավար Արթուր Վանեցյանին:
«Ոստիկանության միջամտության շնորհիվ դա կանխվել է, ու այդ քաղաքացուն տարել են ոստիկանական բաժին, որտեղ նա չի հերքել իր մտադրությունը: Քոչարյանին, Վանեցյանին և Սաղաթելյանին վնասել պատրաստվող քաղաքացին տվել է խոստովանական բացատրություն ու պատճառաբանել է, որ դեմ է «նախկիններին», չի ուզում, որ նրանք իշխանություն ստանան»,- գրված է կայքում։
Դեպքի առթիվ ոստիկանությունում նյութեր են նախապատրաստվում:
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։